زمانه
قادير آللاه بد زامانين اليندن
گونو گوندن ايشلر دوشور يامانا
آنلايانلار آغلير قانمازلار گولور
گؤروم دگيشلنسين تئز بو زامانا
محبت آزاليب سويويوب قانلار
جسد لر يارالي ، سيزلايير جانلار
شهرت اولوب عيبادتلر احسانلار
ايشيق گونلريميز دؤنوب دومانا
بوتون ايشلريميز اولوب اويونچاق
اوزلولر اوزده دير دالدا اوتانجاق
گئچي لر قويونا دئيير تومانچاق
تومانچاقلار گولور كؤهنه تومانا
دده كاتيب بودور سؤزله رين دوزو
دوغرو نطفه لرين بير اولار اوزو
قانماز دوستون ايكي يوزو، اوچ يوزو
قوربان اولسون بير آنليان دوشمانا
گؤنده ر
بؤلوم لر:
دده كاتيب
غفلت
اؤزون داده يئتيش يارادان آللاه
گوجدن دوشدوك قدرتيميز قالمادي
مين دؤرد يور ايل شهرتيميز واريدي
ذليل اولدوق عزتيميز قالمادي
دوستلاري اونوتدوق دوشماني توتدوق
يولداشي بوراخديق اويناشي توتدوق
بيرليك آغاجيني كؤكدن قوروتدوق
دامارلاردا غيرتيميز قالمادي
دامارلاردا ايستي قانلار آخاردي
قيلينجيميز شيمشك كيمي چاخاردي
هر دؤرد طرف گوجوموزدن قورخاردي
هئچ زاد اولدوق هيبتيميز قالمادي
دده كاتيب بيزي پوزدو بو غفلت
ديلده داد قالمادي آغيزدا لذت
خوش جمله دير معلول اولماز بي علت
علت بودور وحدتيميز قالمادي
گؤنده ر
بؤلوم لر:
دده كاتيب
اوچ ها اوچ
ده لي كؤنول
چوخ آه و زار ائيله مه
پروار ائله غمخانه دن اوچ ها اوچ
دردين اولسا آلچاقلارا سؤيله مه
بير دردين آرتيرار ائيلر اوچ ها اوچ
مرد اوغلانلار هر زامانلار مرد اولو
يئمه نامرد لقمه سيني در اولو
قورد بالاسين هر نئيله ين قورد اولو
اصيل قوچدان قوچلوق اولار قوچ ها قوچ
خسيس لرين دويماز گؤزو دار اولار
الدن ياپيشانا مولا يار اولار
شورا يئرده بوستان اكمه خوار اولار
سعيين باتار توخمون اولار پوچ ها پوچ
دده كاتيب چاغير شاه ذوالكرم
حقينه قانع اول چكمه درد-غم
پيس قونشونون قونشولوغون جهنم
يوكون يوكله جهنمدن كؤچ ها كؤچ
گؤنده ر
بؤلوم لر:
دده كاتيب
سئوه رم
عاشق اولدوم بير دلبرين يولوندا
دل وئرميشم من دلداري سئوه رم
آنلايانلار ايچدي ادب جاميني
او سببدن خوش گفتاري سئوه رم
بير گونوم جاواندي بير گونوم قوجا
بير گونوم آلچاقدي بير گونوم اوجا
ياردان غيريسينه ائتمم ايلتيجا
من عاشقم آنجاق ياري سئوه رم
انسان گرگ ناموسوندان اوتانا
لعنت گلسين دوستا يالان ساتانا
نامرد ائيله بيللاه گئتمم گولشانا
مرد ائله آتشي ناري سئوه رم
سيز بير باخين بو زامانين گردينه
نامرد شريك اولمور مردين دردينه
من كاتيبام مايل اولدوم دؤردونه
هر كس بيلير چهار ياري سئوه رم
گؤنده ر
بؤلوم لر:
دده كاتيب
كوراوغلو
ايسترم مردلري تعريف ائيله يم
مردلرين سولطاني قوچ كوراوغلودو
شهرتي ياييليب توتوب هر ياني
ايگيدلرين خاني قوچ كوراوغلودو
عؤمور بويو مردليك ائيله ساواشدي
نامردي اؤلدوردو مرددن ساويشدي
شجاعت مولكونه دوغرو يول آشدي
شجاعتين كاني قوچ كوراوغلودو
صحبتينين آغيزلاردا دادي وار
آشيقلارين مجليسينده يادي وار
تاريخده ن سيلينمز گئتمز آدي وار
اركك ليك نيشاني قوچ كور اوغلودو
كور اوغلو تك ار اوغلانلار وار اولسون
نامردلرين كؤنلو آه و زار اولسون
كوراوغلويا پيس دئيه ن لر خار اولسون
نامردلر دوشماني قوچ كوراوغلودو
كوراوغلو تورك ايدي بير اوغوز خاني
تورك لره قازانييب شوكتي شاني
چاملي بئلده قالير يوردو نشاني
ديل لرين نشاني قوچ كوراوغلودو
دده كاتيب حئيف مردلر كؤچ اولدو
حسرتيميز آرتدي ايكي اوچ اولدو
قوچ دوغولدو قوچ ياشادي قوچ اولدو
اسلانلار اسلاني قوچ كوراوغلودو
گؤنده ر
بؤلوم لر:
دده كاتيب
قادر آللاه بو محنتدن بو غمد
يانديم جسم ايچينده جانيم آغلادي
پروانه تك آليشميشام آتشه
قايناييب جسدده قانيم آغلادي
سگگيز سجده گاهيم بير يانا دؤندو
بئش جسميم اعضادا ديوانه دؤندو
قلبيم قانا گؤزوم عمانا دؤندو
ايكي عينيم بير زبانيم آغلادي
اود آليب آليشديم اوره كده ناريم
گئجه گوندوز بير آللاهه بالواريم
بوتون اوچ يوز آلتميش داماريم
دؤرد يوز قيرخ دؤرد استخوانيم آغلادي
كاتب بير آللاهه واردي پناهيم
بايقو تك ويراندا كيم بيلير آهيم
دنيزلر جمع اولسا چوخدو گوناهيم
ياد ائدينجه روح روانيم آغلادي
گؤنده ر
بؤلوم لر:
دده كاتيب
ساويشماز
گئنه كؤنلوم دوشدو يار سئوداسينا
بلا هاردا اولسا مندن ساويشماز
من عاشقم ساويشماز
بلا مندن ساويشماز
بو عادت دير عاشيق لرده آختارار بلا تاپار
عاشق لردن درد و بلا ساويشماز
هر طبيبه دردين آچماز دال با دال
عاشق اولان معشوقوندان يارالي
يار ووروبدور يارام واردير يارالي
من عشقم يارالي
يار گئيينيب يارالي
شيدا بولبول ناله چكر خار اليندن آه و واه
ياراليام يارام باغلار يارالي
خنجر ووروب داها دئشمز دال با دال
شاعير هردن تجنيس اوخور جيغالي
قابل خياط دونو تيكر جيغالي
عاشق اوخور جيغالي
ديوان تجنيس جيغالي
قناره لر باهار چاغي بوداق اوسته فغاندا
يار زولفونو يارداراييب جيغالي
اؤزگه لره اوزون آچماز دال با دال
دده كاتيب سؤزون سؤيلر دليندن
اول اوره گينده سونرا ديليندن
عزيزيم ديليندن
عاشق اوخور ديليندن
ديل خطردي عاقل انسان خوش دانيشار خوش دئيه ر
خلقي سانجاماز اؤزون قورور ديليندن
هر نه گلدي ها دانيشماز دال با دال
گؤنده ر
بؤلوم لر:
دده كاتيب
دوز انسان
يارادانين قدرتينه چوخ شكور
آدام يارانميشيق دوز انسان بيزيك
موحديك لا اله ال الله
محمد امتي، مسلمان بيزيك
تورك اوغلويوق دالدالانيب سينميريك
دوشمان قارشيسيندان گئري دؤنمريك
بير قيزقين آتشيك تئز-تئز سؤنمريك
قارتال اوچوشلويوق ار اسلان بيزيك
اساس تورك اوغلويوق ايچ اوغوز خانلي
قوچاق نبي بابك باياندير خانلي
دين وطن اوغروندا قورخماز ايمانلي
ساواش ميدانيندا بير قاپلان بيزيك
دونيا بويو وورولماميش وورموشوق
سويوموزدا ثابت قدم دورموشوق
اون سگگير امپراطورلوق قورموشوق
گئري دؤنمز بير مرد ميدان بيزيك
آذربايجانلي ييق بيلسين دونيالار
دنيزلر ، قارالار ، يئرلر ، هاوالار
گورولتو سالاريق قورخار دريالار
داغلار زيروسينده بير دومان بسزيك
دده كاتيب دوغرو يولدان چيخماريق
هئچ كيمسه يه پيس گؤز ائيله باخماريق
دوغرو توركوك ياخماسالار ياماريق
هر زامان مطيع القرآن بيزيك
گؤنده ر
بؤلوم لر:
دده كاتيب
كؤنول قوشو ايستر گيريب دولانـسين
كســــيب قــاباغيمي بو داغلار مــنيم
لــــيلاسيز مــجنون تك آواره قالــديم
ايندي مســكنيم دير بـو داغــلار منيم
ايــــپـــين او ايـــتيب يامان دولاشـيب
صبرين چاناقلارين دولــدوروب داشيب
درديم آغيرلاشـــيب حدديــندن آشيب
ايـــندي يـــوكوم اولـــوببو داغلار منيم
قيلينجيم كـوته ليب دوشوب كــسردن
سـؤزوم قبول اولمــور دوشوب اثردن
آلله اؤزون ســــاخلا بــــونـدان بــتـردن
ايـــچيمي يـــانديري بو داغــلار مــنيم
دده كـاتــيب قيـــساتميشام ديـليـمي
زامــــان چـــرخي بــاغلاييبدير الـيمي
ائـــولادلاريـــم بـوكوب مـــنيم بئـلـيمي
اؤلــــسم قاتيـليم دير بو داغلار مـنيم
گؤنده ر
بؤلوم لر:
دده كاتيب
سلام
بــــاهــار چـــاغي يـــوردوم آذربـــايـــجاندا
ياغـــمور ياغيب آخــــان سئللره سلام
يــــاشيل يــــايلالاردا، ياشـــيل بــاغلاردا
الـــوان غـــونچه لره ، گـــــــوللره سلام
ياشـاسين يوردومون تـــــورك آشيقلاري
توركي شــاعيرلري تــــورك آشــيقلاري
تـــــويــلاردا،بــــايرامدا تـــــورك آشيلاري
ســسينه ، ســــازينا ، تـئـــــللره سلام
ايفــــتيخار ائــــيليرم بــــؤيــــوك تــــورانا
دوغـــــما وطـــــنــــيمه ، آذربـــايــــــجانا
تـــــورك اوغــلويام هر واخت مرد- مردانا
او تـــــوركي دانيـــــشان ديــــللره سلام
يئتميش بابام كندلي من ده كـندلي يم
باشيم عرشه يئتسه من ده كندلي يم
آذربــــايجـــانلـــيام مــن ده كـــند لي يم
بــــو آذربـــايـــجــانلي ائــــللره ســـــلام
دده كــــاتــيب دينديرسه لر جـوشارام
جوشغون سئل تك دالغا ووروب داشارام
كــــندده دوغـــــولموشام كندده ياشـارام
كـــــندده زحــــمت چــكن ائل لره سلام
گؤنده ر
بؤلوم لر:
دده كاتيب