وطنه دوغرو
قادر آللاه هر نه آخير نفسده
اوزونو دؤندرر وطنه دوغرو
بولبول چهچه وورار باغلي قفسده
اوزونو دؤندرر وطنه دوغرو
حسرت عاشق دردي- دلين آچاندا
آزغين مارال داغدان داغا قاچاندا
كؤچمن قوشلار قاناد چاليب اوچاندا
اوزونو دؤندرر وطنه دوغرو
يئرلي قارغا قاريلداييب گولنده
غريب ترلان باغرين باشين بؤلنده
غريب شاهلار تخت اوستونده اؤلنده
اوزونو دوندرر وطنه دوغرو
دده كاتيب عؤمرون گونو باتاندا
قوهوم- قارداش، ائل داشيمي آتاندا
غريب آسلان ياتاغيندا ياتاندا
اوزونو دوندرر وطنه دوغرو
گؤنده ر
بؤلوم لر:
دده كاتيب
يالان دونيا
چوخ اويونلار سنه يارار
يالان دؤنيا دئييل ميسن؟
دون بوْشاليب بو گؤن تكرار
دوْلان دؤنيا دئييل ميسن؟
دَيير مانسان اينسانلارا
قييارسان دادلي جانلارا
اجل بومباسين خانلارا
چالان دونيا دئييل ميسن؟
آتش اوجاغين قوراندا
آجيق تكمه سين ووراندا
قهرمانلاري يوراندا
گولن دونيا دئييل ميسن؟
دده كاتيبين سسينه
چولقالادين غم سيسينه
سوندا اؤلوم قفسينه
سالان دونيا دئييلميسن؟
گؤنده ر
بؤلوم لر:
دده كاتيب
منه نئيلر؟
حيكمت عالميندن دؤرد سؤز اؤيرنديم
آرتيق درده دَيمز سؤز منه نئيلر؟
بيردن باشلاميشام بيرده دورموشام
يئتميش، سكسن، دوقسان، يوز منه نئيلر؟
حياتدا چارپاشيق يوللار كئچميشم
اوّل آختارميشام اوّل سئچميشم
عشقين آتشينه يانيب پيشميشم
اود اودو يانديرماز كؤز منه نئيلر؟
باطيل بئش گؤن اوينار دوشر اثردن
حقيقت شمشيري دؤشمز كسردن
يارادان سالماسين مني نظردن
قوْي باخسين بد نظرگؤز منه نئيلر؟
دده كاتيب الهام آلار اوزاقدان
يولداش اولمام من قورخارام قورخاقدان
درباري لر قورخار توزدان، تورپاقدان
اكينچي اوغلويام توز منه نئيلر؟
گؤنده ر
بؤلوم لر:
دده كاتيب
خبرين وارمي؟
گئجه-گوندوز خلقه ايراد ائد نلر
هئچ اؤزون اؤزوندن خبرين وارمي؟
قونشونون گؤزونده قيلي گؤرنلر
بير باخ اؤز گؤزوندن خبرين وارمي؟
مؤمون قارداش هئچ بيليرسن نئديرسن؟
ايشين بودور خالقين عيبين گودورسن
بئش قدمده دؤردون اَيري گئديرسن
بير دؤن باخ ايزيندن خبرين وارمي؟
حرام مالدان فاخير ليباس گئييرسن
آغيز سيلمك نه دير؟! موردار يئييرسن
آشيغين سازينا حرام دئييرسن
اؤز ساختا سازيندان خبرين وارمي؟
دده كاتيب سن ده بير بيل حسابين
دوز عملين آزدير چوخدور خرابين
قورخ او گوندن اوخوناجاق كيتابين
دئدييين سؤزوندن خبرين وارمي؟
گؤنده ر
بؤلوم لر:
دده كاتيب
اي وطــن تورپــاغي، آمـــــانات ســـاخلا
بيز سنه تاپشــيرديق دده كاتيبــي
اؤزقوينــــوناباســيب چوخ راحات سـاخلا
وطــنه تاپشــيرديق دده كــــاتيبـي
قـــــــورآن اللـــرده يـــدي اوزلــر آللاهــــا
سينه لر دولمــوشدو كـدره، آهـــــا
امداديـــــنا چــــــــاتار حضرت طــــــاهـــا
ياسينه تاپشـيرديق دده كـاتيبـــي
گـــلن چاغـــيريردي بــير تك آللاهــــــي
سسله ييردي محمدرسول اللهي
باغيشـــلانار هاچان اولســـا گــــوناهي
آمينـــــه تاپشيرديق دده كــاتيبـي
وفـــــاتـين ائشــــيدن اوركـــدن يانـــــيب
سؤزلرين ائشيدن اؤيودور سانيـــب
آفــــرين-مرحـــــبا سســـــي قووزانـــيب
تحسينه تاپشيرديق دده كــاتيـبـي
ايكي گــــون كئچميشدي بايرام آييندان
بـير ائــل محروم اولدو دده پايينـدان
سكسن يئدينجي ايل گونش ساييندان
حـققينه تاپشيرديق دده كــــاتيبي
بهرام اسدي(اورمو شاعيري)
قولونجو2/12/87
گؤنده ر
بؤلوم لر:
دده كاتيب
حي صنم
جنون اولدوم سن ديلبرين يـــولـــــوندا
اوزو گــــونش قاره قاشـــلار خـــي صنم
مجنون كــــــيمي دولانيرام داغـــــلاري
مست اولموشام ها چــاغيرام هي صنم
حوسنون مني عشقه سالدي دريندن
چــــــوخ ارنـــــلر پايين آلــــدي درينــــــدن
من قــولـونام، قولـــــون قــووما دريندن
ال مـــــنيمـــدي اتــك ســنــين، اي صنم
من عاشـــقم عشـــق اودونــا مايلم
آزغــين ســئل تك چـــؤلدن چؤله ياييلام
سن ســرور سن من بير گدا سايلم
يــوخســولونان وارلي اولــملز جي صنم
ديلــــــين آب حـيـات درده چــاره دي
كــــيپريگــين اوخ ووروب بــاغريم ياره دي
من كــاتيبام مــنيم دونــوم قاره دي
آل اوسـتوندن سن ياشــيلي گئي صنم
گؤنده ر
بؤلوم لر:
دده كاتيب
يازار
قادرآللاهين قلمي عالمه فرمان يازار
آي گونشه هم فلكه بير عجايب دؤوران يازار
لا شريكدي قدرتي ايله ياراديبدي هر نه وار
گؤز گؤرمه ين بير خانه ده بوش سودان اينسان يازار
انا اعطينا سوره سي شاد ائتدي پيغمبري
يوز ييرمي دؤرد مين ايچينده دوغرولوغون سروري
ديليم اوخور سينه م يازار من نئليرم دفتري
قضا قدر اؤز الينده ايسترسه هر آن يازار
لافتي الا علي حيدردي شاهيم منيم
آزمارام يولدان كيناره دوغرودور راهيم منيم
اگر كي من تقصير كارام چوخدور گوناهيم منيم
لوطف ائيله سه دفترينده بير عفو رحمان يازار
الست گونو بلا دئييب جام ايمان ايچميشم
بئش عالمي طي ائتميشم آلتي اركان سئچميشم
دده كاتيب يار يولوندا بيللاه جاندان كئچميشم
عاشيق معشوقون يولوندا جانيني قوربان يازار
گؤنده ر
بؤلوم لر:
دده كاتيب
فرياده گل
بــــوغيــفلتدن آيــيلميرام اي خــــــدا فــــــــــــــــرياده گل
يـالقيز قالميشـام ظــــولمتده غــــــــوغاده فـــــرياده گـل
اول آدم خلـــق اولاندا يــــاراندي جـــــــــومله گـــــــوناه
بيــر لوطــفودن عفو اولــونار مين خــــطا فــــــــــرياده گل
اوخــــوموشــــام دؤرد كيتــــــــابي بيلميــــرم لــــيل نــهار
بيلمه ديم عؤمروم قدريني كئچدي فورصـــــــت گئتدي كار
كـــــــــل شي هالــــــــــــــك غير از خـــدا كــــــيمدي وار؟
كـــــــفر ايـــسلاما غـــالب اولــدو مدد، اولــدوق تــــارو مار
مــصطـــــــفي دئــدي شــــــانينده لافــــــتي فــــرياده گل
ســونا واردي دفــتريميز شــــيمدي باخين دولـــــدو جــــام
مــوقدرين حـــــؤكــــمونه باخ ايشلر قالـــــدي ناتــــــــــمام
عـجب يولــــون يولچوسويوق فرق ائيله مز خــــاص و عـــام
الـــف الله ب بـشـــــــردن واي آلانـــــــــــــدا ايــنتيقـــــــــام
مـــــــــــــيم محمـمد كان رحــمت سيدا فـــــــــــــرياده گل
صــور چالــــــــيندي اويما غافيل وار حققـــين محضـــــرينه
كـــيم بيلير كـــيمين حالــــــيني هر كــس آغلا ر نفسينه
شـــــاه گدا مــــونتظيردي بير عــــــــــدالت حـــؤكــــمـــونه
كــــــاتيب آديــــــــــن ثبت اولـــــوندو عــاصي لـــــر دفترينه
اي اوخــــونان دؤرد كــــــــيتابا مـــــــــوصطفي فـــرياده گل
گؤنده ر
بؤلوم لر:
دده كاتيب
ابــــجد حســــابيندان دم ووران اوستاد
بئش ايسميدن سوراجايام سـونو دورد
بـــــيرينجي سي تــك آللاهين آدي دير
بـــيري بيردير بيري سگگيز سونو دورد
حق عاشــــقي مرد ميداندان قاچيلماز
عيلم اولمــــاسا دوگون تئز تئز آچيلمـاز
ايكـــينجيسي بيردي ايكي اوچ اولــماز
آلتي ايلــه بير بيري سگگيز سونو دورد
حــققين آدي ديــلده جــــاري مـــــورتب
كــــيبر ائيله مه اول شكسته مـــــــودب
اوچـــونجوسو دورد حرفـيدن مـــــــوركب
سگــيز و قيرخ بــيري اوندو ســـونو دورد
منم دئــــيه ن لرين ســــونلاري هئچ دي
شــيطان كيبر ائيله دي قوولدو قاچــــدي
دوردونجو دوردحروف نقطه سي هئچدي
قـــــيرخ ايله اوچ بيري اون دو سونو دورد
دده كـــاتيب آلــچاق اوچــــان اوجـــــــالار
چــــوخ يئهين آت قــووان دوشــر قوجـالار
بــــئـشينجي سي بــاطل لردن بــــاج آلار
ايكـي قيرخ دي بيري سـگگيز ســونودورد
گؤنده ر
بؤلوم لر:
دده كاتيب
مغرور اولما
اينسان اوغلو مغرور اولما حالا حالدا گــــئده جك
چين چين اولاجاك صورتين خط خالـدا گـئده جك
زامان چرخي پوزدوراجاق دال بوداغين سـولاجاق
دوز قامتين بـوكـوله جك بو جمال دا گـــــئد ه جك
اؤزون چالما داغا داشا ايشينده توت بير حيساب
روزي بؤلن روزي بؤلوب حددســـيز ائتمه شـيتاب
بوتون دونيا سـنين اولـــسا سون يئرين زير تــراب
حساب سنين مال واريثين خام خـيالدا گئده جك
قارون كــيمي مال ييـغاسان يل دسـتان اولاسـان
يا درويش گوشــه نشـــين يادا ســـولطان اولاسان
يا بــير آجـــي ديلـــين اولا يادا غــزلخوان اولاسان
كســـيله جل نــطـق بــيان لب بال دا گــــئده جك
دده كاتيب خان اولاسان خلقه فرمان دئــيه سن
بـــير ياوان چوره گـــين اولا يادا بــــيريان يــيه سن
يا بــير ييرتيق دونــــون اولا يادا الوان گــــئيه سن
سؤكوله جك تيكمه لرين تيرمه شــال دا گئده جك
گؤنده ر
بؤلوم لر:
دده كاتيب