كوچه‌ده، برق ديره‌يينه سؤيكنه‌رك اوتورموشدو. گؤرونوشوندن ده كي، لاپ،
آوارالارا بنزه‌ييردي. «آللاهدان گيزلي دييل، سيزدن ده گيزلي اولماسين»، چوخ
سئوينديم!. بلكه، دئييرسينيز: جاناواري دا ييخيلميش- ايليشميش گؤردوكده
سئوينمك، هئچ بير اينسانا ياراشماز. قالسين كي، اوزولموش بير اينسانين دا،
اينسان يئري وار. هر نه دئييرسينيز دئيين. من سئوينديم. بلكه ده، بيلميرسينيز، الينه
ماتي(اويوندا وورماق سيراسي) دوشدوكده نه قدر مني لاغا قويوب. آنجاق، اؤزومو
اوزگون گؤستره‌رك دئديم: بايرام؟ نه اولوب؟
دئدي: نه‌لر... اولماييب! نه‌لر... اولماييب!.
دئديم: من كي، بيلميرم نه‌لر اولوب!.
دئدي: بايرام اؤلدو... بايرام اؤلدو...
منه بئله گلدي كي، اليمه ماتي دوشوب. گولدوم، دئديم: اؤلوبسن كي،
اؤلوبسن.قان اولماييب كي!. هله، شانسين گتيريب، تانري اوزونه باخيب، گوناهلارينا
باخماييب. يوخسا، ايندي يئرين دامونون(جهنم‌ين) ديبينده ايدي.
دئدي: ال- قولون آغريماسين بئله...!، سنين باخيميندان من دامويا گئتمه‌لييم!
دئديم: بونلاري بوشلا، اؤلدويونه گؤره سئوين. مگر بيز ديري قالانلار نئيله‌ديك، سن
گئري‌ده قالدين!؟ بيز ديري‌لر ده سانكي، ايت آغزينداييق. اوزوموزو گؤره‌نين جيبينده
سيلگج (دستمال) اولمالي‌دي.
دئدي: ايندي‌‌ليك، اؤلوب يا قالما(بقاء) سؤزو يوخدو. ايچيم اوندان يانير كي، او قدر
سئودييين حيات، سني بو قدر اوجوز ساتارميش. بلكه ده بير هئچي- هئچه
داشيديغيمدان اؤترو يانيرام. بلكه دونيا- آخيرتين هر ايكيسيني اودوزدوغوما گؤره
يانيرام. بلكه، گؤره‌ولريمي(وظيفه‌لريمي) ايييجه يئرينه يئتيرمه‌ديييم اوچون يانيرام.
بايرامين دوروموندان مات قالميشديم. ماتير- ماتير باخيرديم. بيلميرديم نه دئييم. بير
سؤز دئميش اولام، دئديم: بايرام، مني باغيشلا، اؤلوموندن خبريم اولماييب. جنازه
تؤره‌نينه گلمه‌ديييم اوچون ده، باغيشلا.
دئدي: ديري ايكن، ياشاياركن بير- بيريميزين هايينا، وايينا، تويونا گئتمه‌ييميز اؤنملي
دي. بير اؤلونون جنازه تؤره‌نينده اوچ آدام گلسين يا اوچ ميليار آدام گلسين، اؤلو اوچون
هئچ اؤنمي يوخدو.
يئنه ده هر سوره كي ساياق، ياواش- ياواش بايرام سؤزون- مئيدانين اييه‌سي
اولوردو. بايرامين سؤزلرينه يانيت (جواب) بولماز كيمي ايديم. بير سؤز بولدوقدا دا
سانكي، ديليم دوگون دوشوردو. تانري‌دان ديله‌ييرديم، سؤز قونوسو دييشيلسين.بوتون
گوجومو ديليمه توپلاياراق، دئديم: بايرام، بيزي لاغا قويوبسان يا اؤزونو. نه اؤلومو؟ باش-
بئيني ايشله‌ينيميز! بير سن ايدين، سن ده كي، دلي اولدون. دور آياغا، ياخشي
دييل، دور گئت ائوينيزه.
دئدي: دئييرم اؤلموشم، دئييرسن: دور گئت ائوينيزه...؟ آخي، بيلميرسن كي، ائوه
ده گئتديم،... گؤرم، من اولدوكدن سورا، خئيراتدان- زاد دان سس- سوراق وار... ؟
دئديم: نه اولدو...؟
دئدي: اوزون ايللر بيرگه ياشاديقدا، گولر اوزونو گؤرمه‌ديييم آرواد، گولوردو! اوز-
گؤزونه ده ال دولانديرميش كيمي ايدي...
دئديم: باخ...، بوراسي سنين اؤزونون باغيشلانيلماز گوناهين‌دي. او سوچو
كيمسه‌نين بوينونا يوكله‌يه بيلمزسن، سوچماني‌سي دا يالنيز و يالنيز اؤزونسن. اما،
دئه گؤروم، بو، بزه‌دييين يئني اويون، چكدييين يئني تاسار (نقشه) نه‌دي؟.
نه‌ايسه، او، چوخ درين‌لره دالميشدي. دئديييمي ائشيتمه‌دي، دئدي: داها...نه‌لر...!
نه‌لر! گؤردويومو دئمه‌يه ديليم دؤنمور.
ايسته‌ييرديم، بايراما، يئنه ده گولم، نه‌ايسه! آغلاديم. دوزو، اؤزومو ايتيرميش ايديم،
بيلميرديم گولوم يا آغلاييم. گولوب- آغلاياراق! دئديم: ان ياخشي‌سي بودور، سن كي،
اؤلوبسن، مين مافايا(تابوتا)، گئت گؤمولدويون(دفن اولوندوغون) مزاردا راحاتجاسينا
يات.
دئدي: آخي، دردين بيري ده بودور كي، قاييتديم گئتديم مزارليقدا نه قدر دولانديم،
مزاريمي تاپانماديم. چوخ گزيب يورولدوقدان سونرا، بير اؤلونون، منه اوره‌يي ياندي،
دئدي: مايماغين بيري مايماق(گيجين بيري گيج)، سن بيلميردين مزاريني
قورومازسان، باشقا بير اؤلو گلر مزارا اييه دورار؟
ياديمدا دييل، آغلاييب گوله‌رك يا گولوب آغلايارياق، دئديم: چوخ گؤزل...! چوخ
ماراقلي...! سن كي ايللر بويو، نه‌يي- نه‌يي الدن وئرديييميزه گؤره، اولمايان- قالمايان
سؤزو گؤزوموزه دئييردين، اؤزون، بئش اؤلونون ايچينده، اؤز مزارينا دا اييه چيخماغي
باجارماييبسان. بوندان بئله، بيرده مني لاغا قوياسان، من بيللم، بيرده، سن. باشينا
ايت اويونو آچارام.
بايرام، دئدي: سن !؟ منيم باشيما...! ايت اويونو...؟
مني سالدي يوموروغون- تپيگين آلتينا. ال آياغيمي ترپتمه‌ييمه ده ماجال
وئرميردي. بيلميرم نه تهر اولموشدو! هردن ده كي، اليندن قورتولوردوم، قاچماق
ايسته‌ييرديم، قيچلاريم- آياقلاريم گؤيده بوشونا فيرلانيردي!!. يئنه ده مني توتوب
ساليردي كؤتگين آلتينا...، قابيرغاما بير تپيك ووردو،... يوخودان آييلديم!. خانيم
قابيرغاما بير دومسوك ده ووردو، دئدي: سندن كي، بير خئيير گؤرمه‌ديك، سني آندا
وئريرم آللاها، ياستيغيني جورله، بير جور يات كي، خور- خورونون سسي كسيلسين،
بلكه، اون دقيقه يوخلاياق.
دوزو، اؤزوم ده يوخلاماق، بلكه ده، دوش گؤرمك ايسته‌ييرديم، آخي، گؤردويوم
دوش ياريمچيق قالديغيندان، بيلمه‌ديم بايرام مزاريني تاپدي يا يوخ!!.
منوچهر فضلي خلف «آزرائللي»
گؤنده ر
بؤلوم لر:
آذري