يازار: بابي پروْبشتاين
چئويرن: كاوه فضلي خلف
آتام منله دانيشديغيندا، هر زامان سؤزونو، «بوگونه قدر، سني نئجه دليجه‌سينه سئوديييمي سنه سؤيله‌ديم مي؟» دئيه باشلاردي. بو سئوگي ايفاده‌سي قارشيليق بولوردو بلكه... اوْنون سوْنراكي ايللرينده، اوْنون عؤمرو گؤزلريميزين اؤنونده توكه‌نيركن، و بونون يانيندا بيزلر بؤيويوركن... آه، بو مومكون اوْلسايدي...
82 ياشيندا اوْ اؤلمك اوچون حاضيردي، و چكدييي دردلرين بيتمه‌سي اوچون، من ده اوْنون گئتمه‌سينه ايذين وئرمه‌يه حاضيرديم. بيزلر گولدوك، آغلاديق، بيربيريميزين اللريني توتدوق و بيربيريميزه سئوگيميزدن دئديك و آنلاشديق كي آرتيق زاماني گلميشدير. دئديم، «آتا، سن گئتديكدن سوْنرا، من سندن، ياخشي اوْلدوغونو گوستره‌جك بير نيشانه ايسته‌ييرم». اوْ بو سؤزون معناسيزليغينا گولدو؛ آتام روحون باشقا بير شكيلده ياشاياجاغينا اينانميردي. منيم ده هئچ بير قطعي دليليم يوْخ ايدي، آمما منيم بير چوْخ تجروبه‌لريم وار ايدي كي مني، «اوْ بيري طرفدن» بعضي سيگناللار آلا بيله‌جه‌ييمه اينانديريردي.
من و آتام اوْ قدر دريندن بيربيريميزه باغلي ايديك كي، اوْ اؤلدويو آن، من اوْنون قلبينه گلن ضربه‌ني كؤكسومده حيس ائتديم. سوْنرالار من ياس توتدوم كي نييه خسته‌خانا، اوْ اؤلدويو آندا قوْيمادي كي من اوْنون اللريني توتام.
گونلرجه اوْندان بير نيشانه گؤرمك اوچون دوعا ائتديم، آمما هئچ بير شئي اوْلمادي. گئجه‌لرجه يوخويا دالمادان اؤنجه بير رؤيا آختارديم. اوپ اوزون بير دؤرد آي كئچدي و من نه بير شئي دويدوم، نه ده بير شئي گؤردوم، اوْنو الدن وئرمه‌نين آجيسيندان باشقا.
آنام بئش ايل اؤنجه آلزايمئر خسته‌ليييندن اؤلموشدو و من اؤز قيزلاريمي بؤيوتدويوم حالدا، اؤزومو ايتميش بير اوشاق كيمي حيس ائديرديم.
بير گون كي سس‌سيز و قارانليق بير اوْتاقدا، ماساژ ميزي‌نين اوستونده ياتميشديم و گؤروشمه‌مي گؤزله‌ييرديم، آتامين سسيني ائشيتديم، نه قدر ده سسيني اؤزله‌ميشديم، اوْ سس مني اؤزويله آليب گؤتوردو. من هيجان‌لانماغا باشلاديم، بلكه بو همن آتامين نيشانه‌سيدير، اوغروندا چوْخ چتين‌ليكلر چكديييم و آختارديغيم نيشانه. آنلاديم كي بئينيم چوْخ يوكسك گوجلو بير وضعييتده‌دير. من تانيش اوْلمايان بير شففافليغي تجروبه ائديرديم، ائله كي چوْخ بؤيوك ميقداردا شكيللري باشيمدا يئرلشديره بيليرديم. ديققت ائتديم امين اوْلام كي من اوْياغام و رؤيا دا گؤرمورم، و بيلديم كي اينسانين ان چوْخ اوْياق اوْلدوغو قدر اوْياغام. منده اوْلان فيكيرلر، دورغون بير گؤله دوشن بير سو داملاسينين، ساكين‌لييي پوْزدوغو كيمي ايدي، بئينيمده‌كي هر شئي بيربيرينه قاريشميشدي و من كئچن هر ثانييه‌ده اوْلان راحاتليق و ساكين‌ليييه حئيران قالميشديم. سوْنرا دوشوندوم كي، «من اوْ بيري طرفدن گلن ايشاره‌لري كوْنتروْل ائتمه‌يه چاليشيرام؛ ايندي اوْنو دوردوراجاغام.»
بيردن، آنامين اوزو گؤروندو، آنامين اوزو! هم ده آلزايمئر خسته‌لييي‌نين اثرلري اوْنون بئينيني اوْندان آلمادان قاباقكي وضعييتينده اوْلدوغو كيمي. پارلاق گوموش ساچلاري، دادلي اوزونه بير تاج كيمي اوْتورموشدو. آنام، اوْ قدر گئرچك و اوْ قدر ياخين ايدي كي حيس ائتديم اليمي اوزاديب و اوْنا توْخونا بيله‌رم. اوْ چوْخ ايللر بوندان قاباقكي كيمي باخيردي، عؤمرونون محو اوْلماسي باشلامادان اؤنجه‌كي كيمي باخيردي. حتتا ژوْي عطري‌نين قوْخوسونو حيس ائتديم، اوْنون ان چوْخ سئودييي عطير. ائله بيل كي بير شئي گؤزله‌ييردي، دانيشميردي. حئيرت ائتديم كي آخي نئجه اوْلا بيلر، من آتاما فيكيرلشيرديم آمما آنامي گؤردوم. اؤزومو گوناهكار حيس ائديرديم، چونكو اوْنا فيكيرلشمه‌ميشديم، اوْنو لاييقينجه درك ائتمه‌ميشديم.
دئديم كي، «آنا، مني باغيشلا، چونكو سن اوْ قوْرخونج خسته‌لييين عذابيني چكمك زوْروندا قالدين.»
عذابلارينين باره‌سينده دئديكلريمي قبول ائتديييني گؤسترمك اوچون باشيني ياواش بير طرفه اه‌يدي. سوْنرا گولومسه‌دي، چوْخ گؤزل بير گولومسه‌مه، و چوْخ آچيقجا دئدي، «آمما منيم بوتون خاطيرلاديغيم، يالنيزجا سئوگي‌دير.» و سوْنرا يوْخ اوْلدو.
تيتره‌مه‌يه باشلاديم، اوْتاق بيردن بيره سوْيوماغا باشلادي. و من چوْخ دريندن آنلاديم كي اؤنملي اوْلان تك شئي و خاطيرلانان تك شئي، بيزلرين وئردييي و آلديغي سئوگي‌دير. دردلر يوْخ اوْلوب گئدر، گئري‌يه آنجاق سئوگي قالار.
آنامين دئدييي كلمه‌لر، منيم ائشيتديييم ان اؤنملي سؤزلر ايدي، و اوْ آن، سوْنسوزا قدر قلبيمده حك اوْلوندو.من هله ده آتامدان بير شئي ائشيتمه‌ميشم، هئچ بير شئي ده گؤرمه‌ميشم، آنجاق هئچ بير شككيم
يوْخدور كي بير گون، اوْنو ان آز گؤزله‌ديييم آندا، آتام گله‌جك و دئيه‌جك
كي، «بو گونه قدر، سني سئوديييمي سؤيله‌ديم مي؟» .
گؤنده ر
بؤلوم لر:
آذري