يولداشلاريمدان نئچه‌سي، گون‌اورتا يئمه‌ييني بيزده يئييب، گئتديكدن
سونرا، يئني يئتمه قارداشيم آياز، بي‌بي‌م اوغلو نبي‌يله بيرليكده گلديلر.
مئيوه، شيريني، ديگر يئمه‌لي‌لرين قورتولوب قالميشيندان! يئيركن، هردن ده
پيچيلداشيرديلار. آرا- سيرا(بعضا)، گولوردولر. آز سونرا بيلديم. اونلارين
گيزليجه اولان سؤزقونولاري اوتاغين كؤشه‌سينده ياريمچيق قالميش، آب
معدني دئييلن سو قابي‌دير.
دئديم: اولار، منه ده دئيه‌سيز نه اولوب؟
نبي، دئدي: ... هئچ...، هئچ نه!
دئديم: ايكي ساعاتدي پيچ- پيچ، هير!- هير!، پيچ- پيچ... سونوندا دا هئچ؟
آياز، دئدي: ... داداش... او... نه‌دي؟
بيردن- بيره، ميرتيم توتدو!!، دئديم: .... سيزه نه؟!
دئدي: دئييرم... كي...، اولارسا بيزده اوندان آزاجيق داداق؟
دئديم: او، اوشاق-موشاقدان اؤترو دييل.
سونرا دا، مثلا، اؤزوم- اؤزومه: آغيزلاريندان سود قوخوسو گلير ... بئله-
بئله شكر دارتمالار!؟
نبي ده كي، جيرتقوزون (دگمه‌دوشرين) بيري‌دي، دئدي: دايي اوغلو،
آغزيندان سود قوخوسو گلنلر، شكر دارتانمازلار!؟ .... شكر دارتماق اؤزلليكله
بؤيوكلرين ايشي دي؟
باشينيزي آغريتماييم، سودان، باشا بير ليوان ايچديلر. بئش دقيقه
كئچمه‌دن هر بيريسي بير زير دلييه دؤندو، بيري گولوردو- چيرتمك ووروردو.
او بيري تيرينگه اوخويوردو. گئت- گئده باشلاديلار اويون چيخارماغا، گؤردوم
داها جيزيقدان چيخيرلار، دئديم: بو ادالار! نه‌دي؟
نبي، دئدي: اونو كي، سن بيزه ايچيرتدين، هر كيم ده بيزيم يئريميزه
اولسايدي بئله اولاردي.
دئديم: اوگوندن كي، دئييرلر سولار ياخشي آرينمير و سوزولمور
(تصفييه‌اولونمور) بيز او سودان، آليب ايچه‌ريك، ايندييه قدر، بيزده كيمسه
دلي اولماييب.
آياز، دئدي: آب معدني؟!
دئديم: ب...ه، نه؟
نئچه دقيقه سانكي، قورباغا گؤلونه داش آتيلميش، كيمسه‌دن سس
چيخمادي، آز سونرا، اوزونو نبي‌يه توتاراق، دئدي: اده دورگئدك، بيز نه قدر
ساده‌ييك كي، بو دا بيزي ساريييب!.
منوچهر فضلي خلف «آزرائللي»
گؤنده ر
بؤلوم لر:
آذري