منوچهر فضلي خلف «آزرائللي»
بؤيوگ اوغلوم عسگرليييني بيتيرديكده، بير تؤرن (جشن) توتمالي، قوناقليق
قورمالي اولدوق. قوهوم- قارداش، دئديلر: قاپي- قونشو بيملزلر كي، بير جانلي
جانيندان اولماسين دئيه، قوربانليق كسديرمگ ايسته‌ميرسن. دئيرلر: يا پولو يوخدو يا
قيزيرغانير. بيرده كي، اوغلون تهلوكه‌لي(خطرلي) بير سورج‌ده عسگرليييني
ساغلامليقلا سوودوغونا گؤره قوربان كسمه‌يين گرك‌دير!. آخي، اوغلوم، امريكا ايراغا
گيرن سورج‌ده، ايران- ايراق سينيريندا عسگر ايدي.
آنجاق، سيرا(نوبت)، قوربانليغين باشيني كسمك سوره‌سينه چاتديقدا، كيم
كسه‌جك‌دير؟ خانيم مني گؤستره‌رك، دئدي: بونون كي، ايشي دييل، بو چوخ
قورخاقدير، قان گؤردوكده، قورخار، حالدان گئدر!
ائويميزده اولان قوهوملار هره‌سي بير تهر، جور به جور نه‌دن‌لرله، ايشين
اوسته‌سيندن گلمه‌ديكلريني دئديلر. اؤرنك اوچون، بي‌بي‌م اوغلو سووغات (جهانگير)،
دئدي: شرايط محيّا دييل! ژيلا خانم (خديجه) گؤرسه اليمه چاقو آلميشام، قهر ائدر بير
ده آشتي ائتمز، بيزيم پسر كوچيكه سهراب دا، چاقودان وحشتناك قورخار!!.
داييمين بؤيوگ اوغلو حاج ابراهيم، گؤزلريمده‌كي يالواريشلاري گؤردوكده، دئدي:
تانري امواتينا رحمت ائيله‌سين، قوربان- موربان كسمك بيلمه‌رم! خوت شالواريم قانا
بله‌نر، حاجييه خانيم مني ائوه قويماز!.
بؤيوك قارداشيم دا، دئدي: گؤزونوزو منه زيلله‌مه‌يين!، كاوا(رشيد) بويوما، ائشمه
بيغلاريما دا اينانمايين، من، بير ميلچه‌يي اؤلدورمه‌يه ده قييمارام!.
بايرام دا، كي، سؤزون باشلانيشيندان ايسته‌ييردي بير سؤز دئسين، اما، اونون
اؤزونو- سؤزونو سايا سالان يوخ‌ايدي!. آرا سايخاشديقدا، دئدي: باشينيزا دولانيم! نه
سووقت‌نن- خدي‌نين آراسينا ساواش سالين، نه زؤهرابي قورخودون. نه ايبيش‌ين ال-
مليني، پال- پالتاريني قانا بله‌يين، قاپي داليندا قويون. گئدين قصابدان نئچه كيلو ات
آلين گتيرين، جانينيزي قورتارين!!.
باشينيزي چوخ آغريتماييم، صداقت-ي چاغيرماقدان باشقا، بير چاره يوخ ايدي.
صداقت-ين بير سيرا اؤزل ورديش‌لريندن(عادت‌لريندن) شيت(لوس- بي‌مزه)
ايشلريندن باشقا، بيچاغيني قوروماسي دا چوخ گؤز چكيجي ايدي. بير بولوشجو
(كاشف) اؤز بولوشونو(كشف‌يني) قورودوغو كيمي، بيچاغيني قورويوردو. بير تهر كي،
آرا-سيرا(بعضا) بيچاغي يئره قويدوقدا، ايكي گؤز ده ساتين آليب! بيچاغينا باخيردي!.
هر يئره گئديردي، بيچاغيني دا اؤزو يله آپاريردي. اينانين!، سو باشينا گئتدييينده
بيچاغي دا اؤزو يله ماوالا آپاردي!. بير- ايكي دؤنه، گؤزل بيچاق‌دير دئيه، آليب بيچاغين
ائن- بويونا باخميشديم، منجه، اؤزل بير بيچاق دا دييلدي.
اويغون(مناسب) بير دوروم گؤزله‌ييرديم، صداقت‌‌دن، بيچاغيني بوقدر سئودييي‌نين
نه‌دن-يني سوروشام. صداقت، آزجيق ائيلم‌دن(فعاليت‌دن)، ايشله‌ديكدن يورولوب،
رنگلي! چاي ايسته‌ديكدن. ايكي ليوان قارامتيل چاي قانتارديقدان . خومارليغيني،
تؤشكوسونو آلديقدان، مورگوسونو(چرت‌ونو) ووردوقدان، كئفي يئرينه گلديكدن سونرا،
اونا دئديم: بيليرم سنين آغزيندان يالان سؤز چيخماز!. هئچ بير قييمته ده يالان
دئمزسن!!!، اما، سني آندا وئريرم اينانديغينا، بالالاري‌نين جانينا، بو بيچاغين نه
اولدوغونو، هاردان گلديييني، عزيزلييي‌نين نه‌دن‌يني(دليل‌يني) يئربه‌يئر، دئيه‌سن!.
صداقت، اوزون بير سوره دوموخدوقدان سونرا، دئدي: آي قارداش...، باشينا
دولانيم، نه‌دن آدامي چتين‌لييه ديره‌ييرسن!؟ بلكه هئچ دئمه‌لي دييل...! بو بيچاغي
چوخ سئويرم. بو ... بيچا...ق ... مكه‌ده... كروانيميزين آشچيسي‌نين الينده‌يدي.
گؤزوم توتدو، اوقدر كي، هاردا، هانسي دوروم‌دا اولدوغوم دا، ايسته‌ييمين قاباغيني
آلانمادي، بو بيچاغي مكه‌ده كروانيميزين آشچيسيندان چالميشام!!.
گؤنده ر
بؤلوم لر:
آذري