ايللردي كي، بايرامي تانيييرام، سؤزونون آرخاسيندا دايانانلارين بيري دي. چوخ- چوخ اوسسال(عقلاني) قونوشار و دانيشار. سؤزون اويغون اولدوغونا اينانيجي اولمازسا، ديلينه گتيرمز. اولسون كي! يانليش(اشتباه) سؤز ده آغزيندان چيخسين، اما، يانيلديغيني دويدوقدا، سؤزونو گئري قايتارانلارين بيري‌دي. نه‌ايسه!، ايكي آياغيني سوخموشدو بير باشماغين ايچينه!، دئييردي: ائوره‌ن(عالم) بير باغ دي!.
دئديم: نه باغي!؟ سنين بايرام اولدوغون ساياق!؟ ائوره‌ن ده(عالم ده) بير باغ‌دي؟!
دئدي: ائوره(دونيا) باغ دي!، چوخ دا اييي بير باغ دي، بلكه انگين(وسيع) اولدوغوندان، بلكه ده بيرآز قاتما- قاريشيق دوشدويوندن!، اورمانا و مئشه‌يه(جنگله) ده! بنزه‌يير. دره- دوره‌سينده آيي وار- قابان وار، قورد- آسلان(شير)، تولكو- دووشان، مارال- جئيران. آوادانليقلاريندا ائششك- قاتير، قاراقاشقا- قيرآت، ايت- تولا، مال- قويون...
ديلي فير- فيرا ساياق ايشله‌ييردي!. دئديم: دايان- دايان!. نه خبردي جاناوارلاري توپلاييرسان؟! يوخسا، نوح پيمبرين گمي‌سيني يولا سالماق ايسته‌ييرسن؟ اوراسينداايشيم يوخ. نه‌دن جاناوارلارين آدلاريني سئچگين‌ليك‌له دوزورسن؟.
دئدي: سؤزون يوخدورسا، تارتان- پارتان دانيشما!. نه سئچگينلييي؟
دئديم: نه‌دن؟ قورد اييلا- آسلاني، بير يانا قويورسان، آيي‌لا- قاباني، بير يانا!؟
دئدي: سؤزون سونونو دئه گؤروم نه دئمك ايسته‌ييرسن؟
دئديم: اؤرنگ اوچون، مارال- جئيران دئديكده، ايكي گؤزلليك دئمك ايسته‌ييرسن. ائششك- قاتير دئديكده ايكي گؤزللييي اولمايان دئمك، اونلاري آشاغيلاماق ايسته‌ييرسن!.
بيرآز دوشوندوكدن سونرا، سانكي، بير آني(خاطيره)، بايرامين بللگ‌ينده (حافيظه‌سينده)- ياديندا و بئينينده جانلانيردي، دئدي: ياديندا مي؟ قوراب-ين ائششگي، كريم‌ا...نين ائوينين قاباغي‌نين ائنيشوو يئرينده قارين ايچينه تاخيلميشدي؟.
دئديم: نه اولسون؟ بو سؤز او سؤزون نه‌سي دي! اونا نه باغلانتي‌سي (ارتباط‌ي)وار؟.
دئدي: ياديندا؟ يا يوخ!.
دوزو، ياديمدا دييلدي، اما، دئديم: ياديمدا.
دئدي: بوشونا دئييرسن ياديمدا...!، اويانيق «بيدار ذهني» اول.
بيردن- بيره، پيق‌ق...! گولمه‌يه باشلاديم. بايرام دا قوشولدو منه. من گولدوم- او گولدو...، او گولدو- من گولدوم.
اوزون بير سوره گولدوكدن سونرا، دئديم: ياديمدان چيخارمي! ايندي‌كي كيمي ياديمدادي. ائششك خيرتده‌يينه قدر تاخيلميشدي قارين ايچينه، قوراب دا، اونون يوكونو آچيب آپاريب قويموشدو حميد-گيلين داملاري‌نين اوستونه. يازيق ائششك، يوكسوز ده قارين ايچيندن چيخانميردي. قوراب اونون قويروغوندان ياپيشيب، دورماغينا كؤمك ائتديكده، تئز- تئز ده دئييردي: ها... آنام سنه قوربان. ها... آتام سنه قوربان. ها... قوربانين اولوم!.
بايرام دئدي: دئه گؤروم، قوراب آغا! چوخ بيلير؟ يوخسا، بيز؟.
دئديم: كسين‌ليكله(قطعا) قوراب. بللي دي!، اونون آدي- ساني وار،بيلگين‌لرين- يئتنك‌لي‌لرين(قابليت‌لي‌لرين) بيري‌دي. هر كيمدن ده سوروشساق، دئير: قوراب يوزقات سيزدن بيليجي‌دي.
دئدي: سندن- مندن يوز قات بيليجي اولان، قوراب، آتاسيني- آناسيني- اؤزونو، ائششگه قوربان وئرير!، من نه‌تهر اؤزومه بوشوق(اجازه) وئره‌رم ائششگي آشاغيلايام؟
دئديم: يوز آريق-ين(آرخين) سويونو قاتدين- قاريشديردين. من كي، بيلمه‌ديم نه اولدو!. قوراب آغا، گيريب قارين خيرتده‌يينه؟ حميدين دامي ائنيشوو يوكو قويوب مارالين اوستونه؟ ائششك يوز قات بيزدن بيليجي‌دي. تولكو آسلاني گمي كيمي دولانديرير!...، سني آندا وئريرم آللاها، بيرجه سؤز دئه، ائوره(دونيا) نه‌جور باغ‌دي...؟ قورتار گئتسين!. بئينيم پارتلادي!.
دئدي: ائوره(دونيا) بير باغ دي، او باغدا، آغاج اكن ده وار. آغاجلاري بئجرن، چيچكلري اوخشايان دا وار. بير آلمادان اؤترو بئش آغاجي ميشارلاييب ييخانلار دا وار. اؤزو بئجردييي آغاجلارين مئيوه‌سيندن دادماغي اؤزونه قيزيرغانان(قييمايان)، مئيوه‌لري پولا چئويريب، سويخاليق(ميراث) قويوب، مزارا گئدنلر ده وار. بير آغاج بئجرمه‌دن، باغا اييه چيخانلار دا وار. باغين نازيني چكيب! بئجريب، باري-مئيوه‌سي اييله، ائلين- اولوسون و اؤزلليكله، مئيوه آلماغا پولو - پاراسي اولمايانلارين تاپيلاريندا (تاپي= قاپي‌دان ايچه‌ري خيدمتچي‌لرين دايانديغي يئر " حضور ")دايانانلار دا وار.
گؤنده ر
بؤلوم لر:
آذري