بير دوستومون اوغلونون تويوندا، دامادين آتاسي "ارسلاني" داماغي
چاغ، كؤكو ده آرتيقراق كؤكلنميش ايكن!، تويون آشيغينا، دئدي: آشيق،
سانيرام كي، دوهالي(نبوغ‌لو)! و اوستاد شاعيريميز، شئعيرلري چوخ!،
...!، ...!، ...! ...! ...! سازي ديللنديرمكده ده باجاريقلي اولان اوستاد!
آزرائللي‌ني، بير كؤشه‌ده اوتوردوغو اوچون گؤرمورسوز؟
ارسلاني، داورانيشي‌لا، سسي‌نين تونويلا، وورغولاماسي‌يلا(تاكيد
ائتمه‌سي اييله ده)، ايسته‌ييردي آشيغين بوينونا قويسون!، آشيق،
آزرائللي‌ني تانييير!. الينده‌كي پولو آشيغا وئره‌رك، دئدي: بو دا اون
مين .گؤروم اوستادين ساغليغينا هانسي هاوايلا بيزي بير داها
كئفلنديريرسن؟
بللي دير كي، آشيق، ائلين تويلاريندا- دويونلرينده، توپلانتي‌لاريندا،
ائلدن درس‌لر آلميش اولدوغوندان، آزرائللي آدلي بير كيمسه‌ني
تانيماديغيني بللي ائتمه‌دي!. اما، سانيرام ، بير گؤزو من‌ده، بير گؤزو
ارسلاني‌ده ايكن، اوره‌يينده دئييردي: اگر بو، اوستاد اوستاد دئدييين!،
دئديكلرينين بئش‌دن بيري قدر ده اولسايدي اؤزوم تانييارديم.سنين
تانيشديرمان گركمزدي!. اما، آچيق اوزله منه ساري گلرك، دئدي:
اوستاد بئله‌يئرده گيزله‌نيبلر سانكي، ايسته‌ييرلر بيزي گؤروشلريندن
محروم ائتسين‌لر!. ياخينلاشيب اليمي سيخدي، قيسا بير خوش-
بئش‌دن سونرا دئدي: اوستاد هانسي هاواني اوخويوم؟
دئديم: باي - گلين‌ين و اگلشن‌لرين ساغليغينا هر بير هاوا كي،
اوره‌يين دئيير، اونو...
آشيق باشلادي، نه ايسه! آز اونجه‌كي آشيق دييلدي، ال- آياغيني
ايتيرميش كيمي داورانيردي!. باشلاديغي هاواني بير تهر سونا يئتيريب،
گلدي اؤنومده ديزلري اوسته اوتوردو. سازي منه سونماق(تقديم‌ائتمك)
كيمي، بير دورونوش‌دا، دئدي: اوستاد، اولار؟ قوناقلاريميز، هم ده من
اؤزوم سيزي دينله‌يك؟.
بو دؤنه، اؤزونو و ال- آياغيني ايتيرمك سيراسي منيم ايدي!.
اوره‌ييمده دئديم: ارسلاني ائوين آباد اولسون! نه‌دن ديلين يئرينده
راحات اوتوورمور؟ بو نه چؤرك ايدي منيم اتگيمه قويدون؟
آشيق، دئدي: اوستاد، اينشاءا..سؤزومو يئره سالمازسيز!
دئديم: يوخ... يوخ... اولماز. ارسلاني‌باي، سايغي- سئوگي‌سيني
بيلديرمك ايسته‌دييينده بو سؤزلري دئدي. يازينسال (ادبي)، بلكه ده
يازينسال يوخ، جيزما- قارالار جيزديغيم و سؤيلم‌لره(سروده‌لره) بنزر
بير سؤزلر يازديغيم اولور، اما، ساز چالماقدا هئچ باجاريغيم يوخدور.
موقددس قوپوزوموزو سئوديييمدن، آشيقلارلا اوتوروب-دوردوغومدا،
اونلارين ائتگيسي‌نين(تاثيرينين) كؤلگه‌سينده آزجيق پرده‌لرين يئري
و ميزراق(مضراب) اييله تانيش اولموشام. اؤيرنجي‌ليك- شاگيردليك
دوروموندا و مرحله‌سينده‌يم ، اونو دا يئتنك‌سيز (قابليت‌سيز) بير
اؤيرنجي كيمي!
نه‌ايسه آشيق ال‌چكه‌سي دييلدي. چاراسيزليقدان! دئديم: باش
اوسته ، سيز بير- ايكي هاوا، داها اوخويون، من اؤزومو توپارلاييم...!
ايچيمده اؤزوم‌له ووروشوردوم: بو نه ايش‌دي؟! آشيغين سازيني
آليم؟ باشلاييم...؟، ائلي- اولوسو(ملت‌ي) اؤزومه گولدوره‌جه‌يم!. اگر
يوخ...، بلكه ده آشيق مني اوستاد سانير، اؤزونو چتين تاپاجاقدير.
درين ساناجاغا(فكره) جومموشدوم. سانكي، بيردن- بيره ايچيمدن،
بير كيمسه،بير سس، بير نفس، ايچ گودو(غريزي) بير گوج، دئدي: نه‌دن
قورخورسان؟. بيرينجيسي، بورادا اوتورانلارين چوخو بيلير، سن نه
آشيق‌سان، نه سازچي. چوخلاري دا بيليرلر، ارسلاني، كيم
دئميشكن، «سنه مايا قويوب، قولتوغونا قارپيز وئريب!». دور آياغا سازي
آل چال- اوخو. قورخما اگر قورخارسان، ايش داها قاريشاجاقدير... گؤر
هانسي كؤكده، هانسي هاوالاردا بارماغين، سسين ياخشي ايشله‌ير
اونلاردان بير- ايكيسي‌ني يامسيلا!. ان اؤته‌سي(فوق‌و) بودور كي،
آشيق بيلر سن بير زاد دييلميشسن!، راحاتجاسينا!! اؤز ايشينه باخار.
گؤرمورسن؟ اؤزونو ايتيريب؟!. اما نه اولورسا اولسون، سن اؤز
باجاريغينا اينان...، باجاريغينا اينان...، باجا...ن، ...با.. اينان...
آرخايينجا !، آشيغين بوشوغونو(اجازه‌سيني)، سازيني آلديم.
ياواش‌دان دا بالابانچي‌نين قولاغينا دئديم: اوستاد، من نوت- موت،
ريتيم- ميتيم بيلمه‌رم...ها...، هاواني نه قايدادا چالديم، ايشين
اولماسين!، دم توتسان گؤرر...!، قوربانين اولوم گؤزله آرخامي بوش
قويماياسان، آمانين گونودو!!.
اوستاد آشيق حسين ساراجلي‌نين اولو روحوندان كؤمك ديله‌يركن،
اوخودوغو «بهمني» هاواسيني يامسيلاديم، بير «قاراباغ دوبيتي»سي،
بير «قايتارما»نين دا چاليب، اوخوماسيني يامسيلاديم.
قاييديب اوتوردوغومدا، اوركدن سئوديييم بير يولداشيم، كي،
سئوينديييندن گؤزلري ده گولوردو، دئدي: يولداش.... اولاناقسيز
(مومكون اولمايان) ايدي! سنه نه اولدو!؟. من قورخودان اؤزومو
خارابلاميشديم!. هانسي اورگ‌نن بئله بير ايشه ال قويدون؟!. لاپ
بئله قورد اوره‌يي يئميشين بيري ايميش‌سن!. سن سازي آلدين،
من اؤلدوم!، اؤز- اؤزومه دئديم: آبيريميز گئتدي!. آخي سن نه تهر
باجاردين؟!
دئديم: اؤزوم- اؤزومه، اؤز اولوشوما(وجودوما) بيرئي(فردي)
باجاريغيما اينانماقلا!. بو ايشين اوسته‌سيندن گلديم. اينسان باجارماق
ايسته‌ييرسه، اؤزونه اينانمالي ايميش!.....
.................................
سؤز اوزانديغينا گؤره، مني باغيشلايين، او گئجه‌يله باغلي،
قيساجاسينا ايشاره ائده‌جه‌ييم گؤزل بير قونو دا واردير، ائل اوغلو بير
آتانين، قوجاغيندا اوتورموش، بير اوغلان اوشاغي، چوخ كؤرپه
اولدوغوندان آياق اوسته دورماغي دا باجارماييردي، گل گؤر كي، آشيق
بيرينجي ميزراغي سازين اينجه‌جيك تئللرينه ائنديرديكدن، مجليسين
سونوندا " موخممس" هاواسي چالينانا قدر آتاسي‌نين ديزلر‌ينين
اوستونده اويناييردي. او اوشاغين دانس‌ي‌نين، قوناقلاري
سئوينديردييي. او توي‌دا هر نه‌يين يئرلي- يئرينده اولدوغو، تويون باشقا-
باشقا گؤزلليكلري مني نشعه‌لنديرديييندن بير قوشما، دويغومدا-
بئينيمده دوزوم- دوزوم دوزولوردو. ائويميزه قاييتديقدا، بيرينجي ايشيم،
او گؤزلليكلري كي، اؤزوم‌له ائويميزه! گتيرميش ايديم، سؤي دفتريمه
كؤچورمك اولدو:
بو گئجه فلگين اوزو گولوبدو
گولور يولداش بيزده، قوناق دا بيزده
سيزيلداييرسا دا ساري سيماوار!
گولور كؤمور بيزده، اوجاق دا بيزده
بير ياندا سيلينير كؤنولدن پاخير
ساغليق قالديريليب اللردن باخير
قاش- گؤز آتير يئنه سنكدن چاخير
گولور بارداق بيزده، آياق دا بيزده
بولودلار چكيليب، آي سالير ايشيق
بو گؤزل گئجه‌يه اولوب ياراشيق
سازي‌يلا كؤنوللر اوخشايير آشيق
گولور پرده بيزده، چاناق دا بيزده
توپلاييب گوجونو آشيق بيلكده
اوينايير سود امر جوجوق بلكده
بو گئجه قوشولوب بيزه فلك ده
گولور قوجا بيزده، اوشاق دا بيزده
دامدان اوغرون باخان گؤزلر ده گولور
ياشماقدا گيزلنن اوزلر ده گولور
«آزرائللي» سؤيلر سؤزلر ده گولور
گولور ديل ده بيزده، دوداق دا بيزده.
گؤنده ر
بؤلوم لر:
آذري