يئدديجه‌نين«هفته‌نين»، گونلري‌نين چوخوندا سحرتئزدن گون
دوغمادان، بايراملا گؤروشوموز اولار. بلكه، او دا گئجه‌لرين بيرچوخ
بؤلومونو اوياق قالير! گؤزله‌يير دان‌يئري سؤكولسون،جانيني يورغانين
آلتيندا او اوز- بو اوزه دؤنمكدن قورتارسين!. هرگون سحر تئزدن
اوتوبوسلار گلمه‌دن، ايكيميز، اوتوبوس دوراغيندا سالاملاشير،
اوتوبوسدا اوتورور بيزيم ايداره‌نين ياخينليغينا قدر، يولداش اولوروق.
بايرامين ايشي‌نين چتين‌يئري بير سندل تاپيب اوتورماقدي!. اوتورماق
همن باشلايير كئچميشدن- گله‌جكدن، شئعيردن- داستاندان،
ديلدن- ائلدن دئيير. دوزو، باش- بئينمي آپارير!. گؤزله‌يين قولاغينا
چاتماسين!، لاپ بئيله آدامي دنگ ائيله‌يير!. نئچه يول دئميشم: بايرام،
بس‌دي! كئچميشدن ال اوز. گله‌جگ‌ييميز ده كي،بللي دييل نه
اولاجاق!. نه‌دن؟ بللي اولمايان بير زاددان!! اؤترو يئرسيزجه‌سينه
ياخاني جيريرسان؟
چوخ واختلار اوتوبوسداكي‌لاردان خور- خور باخانلار- دوداقلاريني
بوزنلر- گولنلر ده اولورلار، نه فايدا! بايرام تؤوبه ائده‌سي دييل كي دييل.
هله بونلار جهننمه!، بير گون اوتوبوسون ايچينده بيردن- بيره، بير
زيرپي‌نين بيري، چيغيردي: قارداشيميز ياسيراره‌فاتين ساغليغينا اوچ‌دنه
اوجالي سالاوات!. هامي سالاواتلادي، بايرامدان ساواي!. بايرامي او
زيرپ‌اولسونون! اليندن آللاه قورتاردي!.
باشيميز بير آز آينيياندان سونرا، بايراما دئديم: اده..! بير اؤلونون
ساغليغي اوچون سالاواتلامانين نه زيياني وار؟!. زيياني كي، يوخدو،
ثاوابي حتمن وار!. آز قالا اليميزه ايش وئرميشدين!.
آنجاق، هر گون اوتوبوسدان ائنديكدن، بيزيم ايداره‌نين اؤنونه
قدر ياياق(پييادا) گئتديكدن سونرا، ساغ‌اوللاشيب آيريلاريق. نقدر
دئيه‌رم: گل ايچه‌ري، گلمز كي، گلمز!. نئچه دؤنه سوروشموشام
: بايرام؟سنين ايشين- گوجون نه‌دي؟. ياشامي نه تهر ياشاييرسان؟
دئييب: نه ياشامي؟! ياشام نه‌دي؟!!
دئميشم: يوخ! ، سن بازارداسان، پوللولارلا اوتورور- دورورسان.
آليش- وئريش ايشلرينه باخيرسان.
بايرام دا، گولوب، دئييب: نه آليش- وئريشي؟! من كي، كيمسه‌دن
بيرزاد آلماغي باجارمارام. ساتماق اوچون ده بيرزاديم قالماييب. اليمده
اولانلارين بوتونلويونو، موفته‌سينه وئرميشم گئديب!
بير- ايكي‌گون اؤنجه، ايداره‌ميزين ياخينليغيندا، بيردن- بيره!،
دئدي: منه باخ! سنين ايمان‌ينين باشينا نه گليب؟!.
انديشه‌يه دالميشديم! بايرام، نه دئمك ايسته‌يير؟!
بيرده سوروشدو: نه اولدو؟
دئديم: نه اولدو! نه‌ايماني؟
دئدي: سنين ايمانين گوجسوزله‌ييب.
ايلكين(اول)، سانديم كي، بايرامين ميرتي توتوب، دئديم: نه‌ايماني؟
نه گوجسوزلمه‌سي؟ يئنه‌ده سحر- سحر دلي‌لييين توتدو..؟!
بايرامين خويو بئيله‌دي، بير سؤزون ياخاسيندان توتدو!، ايش
قورتاردي!. سؤزلري شيديرغي(يكريز) ياغديرار. كيمسه‌نين ده
قونوشماسينا ماجال وئرمز. سؤزونو تكرارلاياراق، دئدي: دئه.. د‌يم..
اي.. ما.. نين.. گو‌ج.. سوز.. له..ييب!!
دئديم: بايرام؟ مگر ايمان يئل‌قووان كولودو؟!، بيرگون ياتا، بيرگون
دورا. بيرگون ساپ- ساغلام اولا. بير گون آخسايا؟! بيرگون دئييرسن
:منوش! سنين ايمانين زيروه‌ده‌دي!. بيرگون دئييرسن: منوش!، سنين
ايمانينا فاتيحه!...بئله‌كي ايش اولماز، قارداشيم...!
سانكي، بايرام بير آز اينجيك- بير آز بوزموش كيمي اولدو!، بوراق
اولموش گؤزلريني، گؤزلريمه زيلله‌ييب، قولومو توتوب سيلكه‌لركن ،
دئدي: سسيني منه قالينلاتما! هوشونو دا توپلا! بير يئره. نه سنين-
نه ده باشقاسي‌نين اينامي‌يلا(عقيده‌سي‌له)، دوشمانليغيم وار،.
ساده‌جه، دويدوقلاريمي ديله گتيريرم.
دئديم، آخي، ديلين لال اولسون، اولماز بير ديلده دئيه‌سن كي،
من ده آنلايام؟!. بيلم نه‌دن اؤترو مني سيغابا(بازجويي‌يه) چكيبسن.
نه‌يين آختاريشينداسان؟.
دئدي: بو كيليساني گؤرورسن؟
بايرامين اوزو ده-گؤزو ده منه باخيردي، اما ايشاره بارماغي
ايداره‌ميزين نئچه آدديمليغينداكي چوخ يوكسك(مرتفع) بير گؤي‌دلن
-آسمانخاراش ساختامانين بؤيرونده، گؤزل گؤرونتولو(منظره‌لي)،
يان- يؤره‌سي انگين(وسيع) چيمنلي- باغلي- باغچالي، تر-تميز
بير كيليساني گؤستريردي.
دئديم: گؤرورم! نئجه؟ يوخسا ....!! يولدان چيخيب، ائرمني
اولوبسان؟!... مووووسيووو...!!
بايراما ائرمني دئديييمدن، اؤزوم ده اوتانديم!. نه ايسه، سؤز آغيزدان
چيخمادان اؤنجه، سؤزجوكلري- سؤزلري آغير- يونگول ائتمك گرك!.يئنه
ده ياشاسين بايرام، دولوخسونسا دا، سينيرلري پوزولسا دا،شاققيمي
پوزمادي. سؤزومون سينسيديجي اولدوغونو يالنيز، اؤزل باخيشلاري‌يلا
بيلديردي، ايشي چوخدا درينه سالمادي!. دئمگ ايسته-دييي سؤزو
آلديم! نه‌ايسه! اؤزومو ووردوم بيلمزلييه، گؤزلريمي زيلله‌ديم گؤزلرينه؟!
دئديم: نه‌اولسون؟!
دئدي: سن هر زامان بورادان كئچدييينده، بللي اولاردي، سنين
اوره‌يينده بو ساختامانا- بو بينايا درين بير سايغي وار. نه ايسه، اوزون
بير سوره‌دير سنده كي او سايغي- او دويغو دويولمور، ان آزي، من
دويمورام!
دوزو، بايراما نه دئمه‌لي ايديم، اؤزوم ده بيلمه‌ديم. نه اينديم نه
دينديم!.
يئنه ده بيرآزدان، بايرام سوروشدو: سونوج(نتيجه)؟!
دئديم: .... بيلميرم !
دئدي: نه‌دن بيلميرسن، كيم بيلمه‌لي‌دير؟!
بارماغيمين اوموزويلا، باشيما ووراراق، دئديم: هنگ ائديب!
ايشله‌مير. بيلميرم نه دئييم.
دئدي: آخي سنين بوكلله‌نين ايچينده، بيرزاد وار كي، هنگ
ائتسين؟، يوخسا بوشدو؟ منجه كي، بوشدو!
دئديم: بير باشين كي، اؤزوندن خبري يوخدو، داش ساليم اونون
دولوسونا دا- بوشونا دا. هله ، بوشونا كي، لاپ بئيله ......... !!
بيرآز كؤوركجه‌سينه، دئدي: بلكه ده، گرچكدن، خبرين يوخدو؟
اؤزوندن آسيلي اولماياراق! بئيله‌سي اولوب؟. چوخدا اؤزوندن
اومسوق(مايوس) اولما!!
دئديم: آخي بو سايغي- قايغي سؤزونو هارادان چيخاردين؟!
دئدي: من، سنين جيكينه- بؤكونه، هر يؤنونه، سنين اؤزوندن
ياخشي بلدم!، سن، لاپ، شينديلي ووردوغون، اسروگ اولدوغون
زامانلاردا، لاپ بئله اوزولدويون- قملي اولدوغون زامانلاردا دا بورادان
بو كيليسانين اؤنوندن سوووشدوقدا، سنين ايچينده‌كي سايغي‌لي-
قايغي‌لي دويغونو گؤزلرينده گؤررديم.
دئديم: دئه گؤروم، سن، بيري‌نين خيياواندا يورومه‌سيندن، اونون
آدديملاري‌نين آخيميندان نه‌تهر بيلرسن، خيياوانين او تاي-بو تايينداكي
تيكينتي‌لره سايغي دويور ، يا سايمازيانا كئچير؟!. سؤزو ده چوخ اوزاتما،
ييغيجام دئه!.
دئدي: گئت...، گ...ئ...ت...! سانكي، منه بايرام دئيرلر..! ،
سني ببكچه‌ليييندن(بچه ليييندن)، منوش‌لوغوندان- منوچهرلييينه
قدر. منوچهرليييندن- آزرائللي‌لييينه قدر! تانيييرام!.
قيسا بير سوره، نه بايرام بير سؤز دئدي، نه ده من. بيرآزدان
سونرا، دئدي: خوب؟!
دئديم: سن كي، اؤزونو چوخ‌بيليجي، هرنه‌يي ايييجه‌بيلن
سانيرسان!، منيم جيكيمي- بؤكومو ، هر يؤنومو اؤزومدن ياخشي
بيليرسن، اؤزون دئه ، نه‌دن بئيله‌سي اولوب؟ دورومو بو آشيريما
(مرحله‌يه) گتيريب يئتيرن ائتگن(عامل) نه‌دير؟ بو دييشيم نه‌دن
اوز وئريب؟
دئدي: قاراباغ
دئديم: قاراباغ؟!. قاراباغ اولايي‌نين(حادثه‌سي‌نين)- ساواشي‌نين،
تانري ائوي دئييلن ساختامانلا نه ايلگيسي وار؟. قودوز روسييه‌نين
ياراتديغي دوروم‌ون(وضعيت‌ين) و اؤيره‌تيم‌لرين(آموزش‌لرين)، آوروپانين
قان‌سوران گوجلري‌نين دورتوسونون(تحريكي‌نين) و قارين‌قولو آمريكانين
آراجليغي‌يلا(واسطه‌سي‌له)، ائرمني‌لرين يولداشلاري‌نين!! و
يانداشلاري‌نين!! كؤمگي‌يله، ائرمني‌الي‌يله دوزنلنميش باسغين و
سوي‌قيريم‌ين، يازيق آللاهين!! و اونون ائوي‌له نه ايلگيسي وار؟!
دئدي: بونو اؤزوندن سوروش!.
دئديم: بايرامجيغيم! بو كره سن يانيليرسان!، منجه، اگر ده
بورالاردان، آللاهين ائوي دئييلن يئرلردن ائرمني‌لره كؤمك اولور،
بورانين بوينونون بورجودور. لاپ دا ياخشي ايش گؤرورلر!.
دئدي، دئمه‌لي! بونلارين ائتديكلري سنين دوندوغونا ده‌يمه‌ييب؟!،
اوره‌يين ده سينماييب؟ يولداشيميز دئميشكن، «بير پرابلئم يوخدو»؟
دئديم: اگر دئيرسم بير پرابلئم يوخدو، يالانچي اولارام!، آزاجيق!
پرابلئم وار!.
بايرام، دئدي: هر زامانكي كيمي يئنه‌ده يانليش دويور و يولو چاش
آدديملاييرسان!. ان دوغروسو و دوزو بودور كي، بيز اؤزوموزدن و
اوماجاق‌يئرلريميز جامي‌لريميزدن كوسمه‌لي و اوره‌ييميز سينمالي‌دي.
بو اوزدن كي، بيز و جامي‌لريميز قاراباغين اليندن توتماق يئرينه
باشيندان دا باسيريق!
بايراملا بيرگه انگيميز سؤز-صؤحبته قيزيشديقدا، بيردن- بيره،
بير گيزيلتي اوره‌ييمدن گئتدي باشيما!. ايچيمه بير تيترتمه دوشدو،
جانيما بير سويوق تر اوتوردو..!، جيبيمدن بير سيلگج(دستمال)
چيخاريب آلنيمين تريني سيلديم. آخي، تزه ياديما دوشدو كي،
ايداره‌ميزين ساختاماني‌نين قاباغينداييق!. شوكورلر اولسون آللاها،
سؤزلريميزي- زادي! ائشيدن اولماميشدي!. ياپيشديم بايرامين
قولوندان، دئديم: سن منيم دورومومو (موقعيت‌يمي) آلقيلاميرسان
(درك ائتميرسن). تئز گئت. من ده اگر ديزلريم تيتره‌يركن چؤكمه‌سم!،
گئديرم بير بئش‌مين‌ليك سالام صاداغا صانديغينا، آخي، نه‌ياخشي كي،
آللاه اوزومه باخيب، امكداشلاردان(همكارلاردان) زاددان! سؤزلريميزي
دينله‌ين- ائشيدن اولماييب، يوخسا ائويم آوار اولاجاقدي! .
گؤنده ر
بؤلوم لر:
آذري