كئچن گئجه ائويميز دولو ايدي، باجاناقلاريم، دامادلاري- قيزلاري، اوغلانلاري-
گلين‌لري، نوه‌لري... ماشاء...ا ماشاء...ا. بيزه ده! ماشاء...ا، ائويميزده مئيوه- شيريني
تؤكولموشدو آياق آلتينا، خانيم نئچه جور خوروش بيشيرميشدي. بؤيوك بير قازانچا دا
دوگو دمله‌ميشدي. بويورموشدو رستوراندان جور به جور كابابلار گتيريلميشدي. من
ده سورج‌دن يارارلانيب(وقت‌دن استفاده ائديب) خيرتده‌ييمه قدر يئميشديم. ايندي
گل!، يوخلا گؤروم!. خانيميمين «سؤزلري قيزيل سويو اييله يازمالي‌دير»!. او، هميشه
دئير: گون اورتا يئمه‌ييني، ايش يئرينده چوخ يئه، باجارسان چؤركدن- زاددان دا قاتما-
قاريشيق، بلله‌له، گئجه ائوده يئمه‌يين گرك اولماسين. شام يئمه‌يي چوخ ايته‌م‌لي
(ضررلي) اولور. قورساغينا- باغيرساغينا دا زيياني وار، قارين دولو ايكن ياتماق اوره‌يين
قنيمي‌دي!.
خانيم دوز بويورور، هر گئجه شام يئمه‌يي يئديكده، اوزلليكله يئييب تئز ياتديقدا،
سحرين اؤزونه قدر قاتما- قاريشيق دوش‌لر(رؤيالار) گؤرورم.
گؤزل بير باغدا، بارلي آلما آغاجي ايديم. ايلين هر بؤلومونده، ياي‌دا- يازدا، قيش‌دا-
گوزده، بوداقلاريمدا چيچك وار ايدي، آلما دا وار ايدي. آري‌لار بال چكيرديلر. كپنك‌لر
«حال»! چكيرديلر. آدام- اينسان يئييردي، قوش- اوچان، يئييردي. قاريشقا، سيچان،
يئييردي. دؤورم‌ده اوت بيچن كيم- كؤلگم‌ده چاي ايچن كيم. آلمالاريمي ساتان كيم-
خينالي اللرييله، گلين‌ين باشيندان آتان كيم. سحر اوغلان الينده، آغشام بيرقيز
الينده. گيزله‌مك يئري يوخدو، او كئف‌چكن من ايديم! قيزلارين ناز الينده.
يازيقلار اولسون. شاختالي بير قيش مؤوسمينده باغا بير دووشان گلدي، آجليق
هئي-يين اوزموشدو. چوخ يالواردي- ياخاردي، دئدي: قاخماغيندان بيرآز يئييم؟.
دئديم: قاخماق! نه دئمك‌دي !؟.
دئدي: قاخماق!، قار- قابيغين !.
قاخماق، قار- قابيق دئدييي!، منيم تين-يم، تن-يم (روحوم- بدنيم) ايدي. اتيم-
قانيم- جانيم ايدي!.
آنجاق كي، كؤيرك اوره‌ييم «يوخ» دئمه‌يي اؤيرنمه‌ييب. گؤردوم يازيق اؤله‌جك‌دي.
چيرمالانديم، دئديم: گل، يئه !.
باغداكي آغاجلارين چوخو قيش يوخوسوندا، بير آزي نشعه ايدي، بير چوخو خومار
ايدي. آرا بير اوياق اولانلار، دئديلر: بو نه ايش‌دي!؟ سني يئييب قورتاراجاق.
دئديم: بيرآز قار- قابيق‌دي نه اولاجاق !؟.
دووشان يئدي، دويدو گئتدي. يارالاريم گؤينه‌ييردي، اما، آزجيق قابيق اييلا بير آجي
دويورموش ايديم، اؤزم- اؤزومو اؤيوردوم!.
آغشام چاغي، يئنه دووشان گلدي، نه‌ايسه! تك دييلدي يولداشلاري اييلا بيرگه
گلميشديلر. نه بير سلام نه بير كلام، هارينليقلا قارينلارين دويورماغا باشلاديلار.
بدنيمده ساغلام بير يئر قويماديلار.
قيش سونا چاتديقدا، خيمير- خيمير(ياواش- ياواش)، بوتون آغاجلارين يازي گلدي.
منيم دووشانلار آپارميش يازيم قاييتمادي!!. گوندن- گونه چيچكلريم سولدو! ياپراقلاريم
سارالدي. ياواش- ياواش دال‌لاريم اؤلوشگه‌ييب- آلمالاريمين اوزو قيريشدي!. باغوان،
منه «بارسيز آغاج» آدي وئردي، سووارمادي- بئجرمه‌دي.
گونلرين بير گونو باغا قريبه ! بير آدام گلدي، گؤزلريمين ده ايشيغي آزاليب‌دي، اونو
تانييابيلمه‌ديم. ياخينلاشدي، گؤردوم كي، او صداقت دير. باغوانا ساري گئده‌رك،
ياغلي ديلي اييله، بئيله!! قويروغونو بولاياراق، دئدي: آغا! بو دهره‌مين ساپي يوخدو.
باغوان، مني گؤستره‌رك، دئدي: او سن، او دا قورو آغاج، قول- بوداغين قوپار، آپار.
صداقت، بوداقلاريمين بيرين دهره‌له‌دي، گؤزلريمين اؤنونده، يونتالادي، دهره‌سيني
ساپلادي!. سويون، وريانين قاباغيندان بير داش گؤتوردو!! بير آغاجين كؤلگه‌سينده
اوتوردو، دهره‌سيني بيلؤوله‌دي، سوولادي، قالخدي- دوردو. باغوانا ساري يوردو.
منجه بئيله! بو دؤنه، هئچ قويروغونو بولامادن، دئدي: ياك(شيطان) دئيير!! بو آغاجدان
بالتانا دا بير ساپ ساپلا...
باغوان دئدي: او سن!، او دا بارسيزآغاج هر اويون كي ايسته‌ييرسن باشينا آچ.
كس!- ييخ!- آپار.
صداقت دئدي: بالتامين ساپي دوزلسه منه بس‌دي!.
او گوندن گئجه‌لر صداقت اييله بالتاسي، باغي باييرا چئويرمگه باشلاديلار.
نئچه دؤنه تين-يمي(روحومو) گؤندرديم باغوا‌ني يوخودان اوياتسين!. نه‌ايسه،
يارالي، اؤلزيميش بير آغاجين سسي‌نين گوجو، اونو اويغودان اويانديرماغا
يئته‌سي دييلدي. نئچه دؤنه بو اينجارسيز سسيم اييله باغيرديم كي، هارا...ي
باغوان، «دور، دورما، دور ترپن، دور» داها بس‌دي- بالتا، اوره‌ييمين بنديني
كسدي! ... بالتا ... اورك ... اورك ... بالتا!.
نه ياخشي! كي، اللي ايلدن سونرا، ساققاليم آغارميش سوره‌ده، اؤيرنديم،
آجليق اؤزو بؤيوك بركت ايميش!!. يازيقلار اولسون منه، ايندييه قدر آجليغين
قييمتيني، دگريني بيلمه‌ميشم!.
گؤنده ر
بؤلوم لر:
آذري