ايش يئرينده، رستمي‌نين اوتاغينا گئتديييمده، گؤردوم، اونون بئش- آلتي ياشلي اوغلو، بير بوجاقدا كار- كاغازلا باشيني قاتيب، دئديم: نه‌دن بونو آپاريب اوشاقلار باغچاسيندا(مهد كودك‌ده) قويمورسان؟.
دئدي: نه بيليم...، بئله‌سي!.
وئردييي يانيت(جواب) قانديريجي دييلدي. اونا گؤره، قوشقولانميش(شك‌ائتميش) كيمي ايديم، بير ده سوروشدوم: نئجه‌كي...! بئله‌سي؟.
دئدي: خانيم حسيني بونو باغچادان قووالاييب...!، دئيير: ياراماز اوشاقدي!.
دئديم: بو دا اولدو سؤز...؟ بللي‌دير بو ياشدا اوشاق چيغير- باغير سالار، ييخار- ييخيلار، ساواشار- باريشار.
سانكي، يئني بير سؤز يادينا دوشدو، دئدي: آغا فضلي، نه ياخشي كي، گلدين. دئييرم، اگر اولارسا، اونون يانينا گئده‌سن، آراچي‌ليق ائده‌سن، بلكه، سنين سؤزونو يئره سالمادي.
دئديم: نه ٱراچيليغي!، اونون، ائيله‌جه‌ده امكداشلاري‌نين(همكارلاري‌نين) بورجلاري‌دير، پول آليرلار، سنين، منيم، اوبيريسي‌نين اوشاغينا باخسينلار. ياپيش اوشاغين قولوندان آپار، آت باغچايا، قاييت گل.
دئدي: نئچه دؤنه گئتميشم، مني آدام يئرينه قويمور!.
چوخ توولو، خيياواندان دا يوخ! آغاجلارين آراسيندان، چيمنلري آياقلاياراق، اوشاقلار باغچاسينا گئتديم.
خانيم حسيني دئدي: به به!، آغا فضلي، يول ايتيريبسيز! نه جور اولوب...؟. كئچن گئجه ائوده، آغا فيروزي دئييردي: «چوخدان‌دي سيزي گؤرمور، سيزين بؤلومه گلمه‌ييب، سيزده اونلارين بؤلوملرينه گئتمه‌ييبسيز.»
دئديم: تانري ايسته‌ين اولسا، گئديب اؤزويله گؤروشه‌رم، سيزده منيم سلاميمي يئتيرين.
سوروشدوم: رستمي‌نين اوغلو، نه‌دن باغچايا گلمير؟!
ديكسينه‌رك، دئدي: واي......! داداش فضلي گؤزله‌يين، مندن ايسته‌مه‌يه‌سيز، او بلانين! باغچايا گلمه‌سينه بوشوق(اجازه) وئرم.
دئديم: بئله‌كي، سيز داورانديز...!، رستمي‌نين اوغلونون آدي گلديكده بير تور گؤيه آتيلديز، سانديم(فكر ائتديم)، دئپرئم(زلزله) اولدو!.
دئدي: او اوشاغين يانيندا، يئنه ده ياشاسين زلزله!.
سونرا دا، آرتيردي: واي... بيژن‌ين اليندن...!، واي... بيژن‌ين اليندن...!!.
يوموشاقليق‌لا، دئديم: رستمي‌نين دورومونو آلقيلاماق(درك‌ائتمك) گرك‌دي. اونون خانيمي خسته‌دي- تيلبه‌دي ائولرينده اوشاغا باخان يوخدو، بو ايشين دوگونونو بير تورلو آچسانيز .
دئدي: منجه، بير يولو يوخدو.
شاققيمين پوزولدوغونو گيزله‌مه‌يه چاليشاراق، دئديم: دوزو! بيلميرم، يولو يوخدور نه دئمك‌دي.
دئدي: آتاسينا... دئميشم.
سانكي، باخيشلاريمدان دويدو، بو سؤزلرله ال‌چكه‌سي دييلم. سارسيلميش بير دورومدا، اوزونو مندن گيزله‌مه‌يه چاليشاراق «توروك خانيملارين ياشماق توتماسي كيمي، بير دورومدا»، دئدي: داداش، بو سؤزو دئديييمه گؤره مني باغيشلا، سانيرام كي، چاره يوخدو....!، دئيه‌جه‌يم....!، بيژن اوشاقلارا پيس- پيس ايشلر اؤيره‌ديردي....!
اوشاقلار باغچاسينا گئتدييمده سينيرلي(حرص‌لي) اولسايديم دا، هارادان گئتديييم، نه جور گئتديييم آني‌يمدا و بللگ‌يمده(خاطره‌مده)، اما، دؤندويوم، رستمي‌نين اوتاغينا، هارالاردان، نه تور، نه دورومدا قاييتديغيم بللي دييل!، بيلميرم اوتانديغيمدان ايدي يا يورغونلوقدان، اوز- گؤزومون هر يئري داميتما(تقطير) آلتينه دؤنموش كيمي‌ايدي، تر تؤكولوردو. ماسانين(ميزين) اوزه‌ريندن سيلگج(دستمال) گؤتوروب تريمي سيله‌رك دئديم: اده...! سن كي، بيليردين پ....... سبده ساليبسان، نه‌دن مني گؤندردين، نئچه ايلليك دوستومون خانيمي‌نين يانيندا، بير پوللوق ائتدين؟. بيژن‌ي سسله‌ديم: گل...، گل بورا گؤروم. نه‌دن سني اوشاقلار باغچاسيندان قووالاييبلار؟
او، دولوخسوندو. دئديم: اگر دئدين...!، بلكه، بير ايشيم اولمادي، يوخسا سني قولاقلاريندان دووارا ميخلارام...... او ايشلري كي دئييرلر، كيمدن اؤيره‌نيبسن؟.
دئدي: ..با.. باباملا .. ما...مانيمد...،
من كي، آياق اوسته دايانميش ايديم، ايكي اليمله باشيمي توتاراق سندل-ين اوستونه چؤكدوم...، اوزون بير سوره، اوتاقدا بيژن‌ين ايچيني چكمه سسيندن باشقا بير سس، بير هنيرتي يوخ ايدي. آتاسي‌نين باشي آشاغا اولسا دا، قيزارماسي بللي ايدي. بوغازيني قهر توتموش بير دورومدا، سانكي، آغير شله‌نين آلتيندا ايكن قونوشور، دئدي: آغا فضلي...، بيرجه اوتاغيميز وار، اوراسي، آنامين، منيم، خانيميمين، بونون، بالاجا قارداشي‌‌نين، يئمك- ايچمك، اوتورماق، ياتماق يئريميزدي. هر اون- اون‌بئش‌دن بير، باجيم گلر، آنامي چيميزديرمك، پال- پالتاريني زاديني يوماقدان اؤترو، اؤز ائولرينه آپارار!. قالاريق بيز، بيرده بو اوشاقلار...، بيلميرم نه تهر باشا دوشوب... يا ... گؤروب!.
يازيق، سسسيز آغلاييردي، دوزدو كي، اوزونو گؤرمك اولموردو، اما، اوموزلاري‌نين(چييينلري‌نين) آتيليب دوشدويوندن، آرا بير بورنونو چكديييندن بللي ايدي اؤز ايچينه آغلايير. يئر- گؤي باشيما دولاناركن، اوتاقدان چيخديغيمدا، قولاغيما دگدي، اؤزو- اؤزونه دئييردي: يوخسوللوغون كؤكونه قارغيش... يوخسونلوغون(محروم‌لوغون) كؤكونه قارغيش.
گؤنده ر
بؤلوم لر:
آذري