دئديم: ماشاء‌ا... ! ماشاء‌ا... !
بؤيوگ‌آغا، دئدي: نه‌دي !؟
دئديم: هردن ده بير آياغي‌نين آلتينا باخ! بلكه قاريشقادان زاددان گؤردون !
دئدي: نه اولوب !؟
دئديم: ماشاء‌ا...، كيمسه‌ني سايا سالميرسان!
دئدي: من، سنين دئديكلريني هئچ يئره يوزا بيلميرم !
دئديم: من ده گومان ائتميرم بوگونه قدر سنه، بير يامانليغيم توخانميش اولا.
بؤيوگ‌آغا كي، بئله‌سي بير دورومو گؤزله‌ميردي، اوز- گؤزو بوزاردي، سينيرلري پوزولدو.
دئديم: گؤرورسن؟ سنين حالين بئيله‌دي، من يولداشليقدان، قوهوملوقدان، ايلگي‌لردن سؤز آچيرام، سن بوزاريب، قيزاريرسان.
دئدي: من بئله‌سي‌يم، ان آغير- آجي گونلريمده ده بير يول ياماقلي گولوش گولمه‌ميشم، يئري گلديكده بوزاريب قيزارميشام دا. بير بارداق آيران باغيشلايانين قارشي‌سيندا اينگيميزي قوربان كسمك ده اليمدن گلمز !. دردلرين كؤلگه‌سينده اوشودويوم گونلرده، بير گونون ايچينده نئچه اؤلوم ياشاديغيم گونلرده ده، يئري گلديكده قاه-قاه گولموشم. نه ايسه ! ايندي مچيدين ايچينده- ياس‌تؤره‌نينده، يوزلرجه قوهوم- قونوشون، اؤزون- اؤزگه‌نين، يارين- يادين يانيندا، سنين ميرتين توتوب ! منيم ده كي، بئله‌سي شيت شوخلوقلارلا ايشيم اولماز.
دئديم: بيزيم ايلگيميز، يولداشليغيميز بئش- اوچ گونون دييل، بو قولايليقدا قيريلسين، ياديندا مي؟، كؤيلولريميز بيزيم آديميزي ايكيزلر چاغيرارديلار! چوخ دا كي، ايندي سن اللي ميليونلوق ماشين مينيرسن، من بئش ميليونلوق...، سندن بير زاد ايسته‌ين ده كي يوخدو، آللاهين سالامينا جاواب وئر !... قويما «سن- من» گيرسين آراميزا.........، نه‌دي !؟ ديل- دوداغيني چئينه‌ييرسن ؟!
سؤز اوزانديقدا بؤيوگ‌آغانين رنگي چوخراق سارالير- اوز گؤزو آرتيق قيزاريردي، دئدي: نه خبردي !؟ باش- بئينيميز گئتدي، تانري ائوره‌ن‌ين(عالمين) گوجونو توپلاييب وئريب سنين ديلينه !
اوزونو يان- يؤوره‌ميزده اولانلارا، سؤزلريميزي ائشيدنلره توتاراق، آرتيردي: ياخشي دينله‌يين، بلكه، بو يازيغين مقامي يوكسلسين ! دوز دئيير، بيز بونونلا قوهوملوقدان باشقا، اللي ايل‌دي يولداشيق. گوجونون يئتدييي قدر ده يولداشليغيندا- يانداشليغيندا(طرفدارليغيندا) داياناقلي دي. هميشه مني سئويب، منه كؤمكچي اولوب. چوخونوز بيليرسينيز، من بالاجا اوشاق ايديم آتام- آنام اؤلدولر، مني، بؤيوك قارداشيمي، بالاجا باجيمي اؤكسوز(يتيم) قويدولار. چوخ‌دا كي، رحمتلي بؤيوك بابام وار ايدي، كؤلگه‌سي باشيميزين اوستونده ايدي، اما، اونون دا ياشاييشي‌نين سون ايللري ايدي، آغ ساققال، بئلي بوكولموش كورون بيري ايدي. او گونلر اوزاق بير كئچميش‌ده قالسا دا. او آجي گونلرين مزارداشي‌نين اللي ياشي اولسا دا، هر بير آن‌ي، اينديكي كيمي گؤزومون اونونده‌دي، اونودولماسي دا اولاناقسيزدي!!.
بارماغي‌لا مني گؤستره‌رك، آرتيردي: بو، هر سوره- هر يئرده منه كؤمكچي اولوب، اؤرنگ اوچون ياغلي دورمه‌ييني- قايماقلي بلله‌سيني هميشه منله ياري بؤلردي. اوشاقلار مني اويناتماديقدا، بو دا اوينامازدي، دئيردي: بؤيوگ‌آغا اوينامازسا من‌ده يوخام...، سانميرام، هئچ بير نه‌دن، هئچ بير نسنه بيزيم آراميزداكي ايلگي‌ني، باغلانتيني اوزه بيلسين. بوگون، مچيدين قاباغيندا، ماشيني ساخلاماغا يئر آختاراركن، خانيميم دئدي: بؤيوك ! هوشون هاردادي !؟
دئديم: نه اولدو؟
دئدي: گؤرمورسن؟ آغا منوچهر پاپاق ساللايير.
دئديم: هاني؟
دئدي: اودو...، خيياوانين تين‌يندن دؤندو، گئتدي.
دئديم: هانسي آغا منوچهر ايدي؟
دئدي: شاعير آزرائللي
دئديم: بئيله دئدين آغامنوچهر! شاعير آزرائللي! من ده دئييرم گؤرن!؟ كيمي دئيير !، دئيينه اؤز منوش-وموز. هئچ يئره گئتمز، يئنه ده تاپيلار گلر، من ده بير تهركؤنلونو آلارام....، نه بيليم آغانين دوندوغونا دگه‌جكميش !
بؤيوگ‌آغا، سؤزلري‌نين آردينجا، وورغولادي: بو آغا ! يئني‌ليك‌ده ائل دردي دويانلار جرگه‌سينه قوشولماييب!!. اوشاقليقدان اؤزونو، درد بيلن گؤسترمك ايسته‌يردي !... ياخشي... كئيف ائيله‌دين !؟
بيلمه‌ديم، بؤيوگ‌آغا كئيف ائيله‌دين دئدييينده، نه حالدا ايدي، آخي، باشيم آشاغا دوشموش ايدي، سانكي ائوره‌ن(عالم) آوار اولوب باشيما چؤكموش ايدي. تانري‌دان اؤزومه اؤلوم ديله‌ييرديم! گؤزلريمدن آخان ياشلارين ايستي‌لييي ياناقلاريمي يانديريردي. بلكه، ياناقلاريم اوتانديغيندان گؤينه‌ييردي! باشيمي قاوزاماغا، بؤيوگ‌آغانين، يان- يؤوره‌ميزده‌كي‌لرين اوزلرينه باخماغا گوجوم يوخ ايدي. ديليم توتار- توتماز، دئديم: بؤيوك آغا، من، دوداق قاچدي! اولسون دئيه بير سؤز آتديم، سن يوزلرجه چؤزولمز كلف‌ي- يوماق‌ي سورودون گتيردين اورتاليغا...، بيلمه‌ديم !! مني باغيشلا.
بؤيوگ‌آغا آجي بير گولوش گوله‌رك دئدي: هه... !، باياقدان، او يازيق مداح، ميكروفونون آرخاسيندا بوغازيني ييرتدي، يئري- گؤيو ووردو بير- بيرينه، سنين گؤزوندن بير داملا ياش چيخمادي. ايندي گؤر...، آدامين آناسيني بئيله آغلادارلار!
سؤزونون آردينجا آرتيردي: هله، تكجه، قايماقلي- بال كره‌لي بلله‌لر دييل، سؤيله‌مه‌لي بللك‌لريم و آني‌لاريم(خاطيره‌لريم) وار. اورنگ اوچون بايرامداكي شال‌ساللامالاريميز- قورشاق‌ساللامالاريميز!.
دئديم: بؤيوگ‌آغا... ، سن، هئچ ده بؤيوك آغا دگيلميشسن!. چاش ايشله‌ميشم، ......! يئميشم‌دن باشقا، داها نه دئييم، سؤزو قورتارارسان !؟
سانكي بؤيوك آغا، آزجيق يومشاميشدي، دئدي: سن كي، منه يامانليق ائتمه‌ييبسن، توتاليم كي، بلكه ده!، منوشو ياخشي گؤسترمك ده ! ياخشي‌ليقلاري‌نين يانيندا وار ايميش. من ده سني سئويرم، يالنيز و يالنيز دا، سني سئوديييم اوچون، باشقا بير قونو اييلا دا ايلگيسي يوخدو. تانري اؤزو تانيق(شاهد)دير، دوستولوغومدا نه بوياق وار، نه يالان.
آرتيردي، من ده سني آندا وئريرم تانرييا، ايندي كي، دردلريمين چووالي دلينيب، قوي بير آزجاجيغي تؤكولسون !
دئديم: آخي... ، آغرين جانيما، نه‌دن، دردلرين منيم باشيما تؤكولسون؟.
اؤزو دئميشكن، آغريلاري‌نين چووالي ييرتيلميش ايدي، ايستر- ايسته‌مز تؤكولوردو، دئدي: «سؤز واختينا چكر»، ايندي ده بايرام آغشامي‌دي، قوي، اود گونو آغشامي‌نين قورشاق ساللاماريندان دا دئييم.
بؤيوگ‌آغانين سسي‌نين تئللرينده‌كي يوموشاقليق، باشيمي قالديريب اونون اوزونه باخماغيما، كؤمكچي اولدو، او دئييردي: هه...، بيزيم ائويميزده، كيميميز وار ايدي ! اوشاقلارين شالينا- قورشاغينا جوراب باغلاسين، آلما باغلاسين، ناخيشلي يومورتا باغلاسين. اونلارين دا آنالاري منيم شاليما باغلاسينلار!؟ بيزيم ائويميزده، بير كور بابام ايدي- اوچ اؤكسوز اوشاق. كورسوموزون ده اوستو بوم- بوش !، منوش اودگونو آغشاملاري مني چاغيراردي بيرليك‌ده شال ساللاماغا گئدرديك. باجالاردان شال ساللاديقدا، ائو اييه‌سي سوروشدوقدا: كيم دي؟ من هئچ نه دئمزديم!، منوش، دئيردي، او قورشاق دا بؤيوك‌آغانين‌دي. ائو اييه‌سي منوشون شالينا آلما باغلاديقدا، منيم شاليما دا بير چورويون باغلاياردي !. آرا- سيرا دا آه چكيب، اوركلري‌نين يانديغيني فلگين قولاغينا چاتديراراق! بير آلما باغلايارديلار، بلكه ده هئچ، ايشلري يوخ ايدي شال ساللايان كيم‌دي، بؤيوك‌آغادي يا باشقا بير اؤكسوز ! اونلارا نه اؤنمي وار، بير اؤكسوزه مرحمت ائتمك ! ثاواب قازانماق ايسته‌ييرديلر.
بؤيوگ‌آغا، منه ايشاره ائده‌رك، آرتيردي: بير ده كي، هر ائودن قورشاغيميزا ايگده، انجيل، قووورغا،........ باغلاسايديلار، بو، دئيردي: منيم جيبلريم دولوب! اؤزونونكولري ده منه وئردي.
بؤيوگ‌آغانين سؤزلري، او گونلرين بللك‌لريني- آني‌لاريني (خاطيره‌لريني) منيم ده گؤزلريمين اؤنونه گتيردي. بير آن او، چكه- چك‌لي دورومو اونوداراق، دئديم: هه...، يولداش، اوراسيني دا دئ، داداشين، دئميشدي: «گؤرمه‌ميشين بيري گؤرمه‌ميش، نه خبردي؟ او قدر يومورتا تيخيبسان، سانكي كورسونون آلتينا ايت جمده‌يي گتيريبسن!!»
بؤيوك آغا دا گولدو، دئدي: دوز دئيير، منيم شاليما كي، يومورتا باغلانيلمازدي، منوشون شالينا باغلانيلميش يومورتالاردان، تئز- تئز، سويوب، لوم- لوم لومپالارديق. داداشيم، كي، نه بيريندن بايرامليق اوماردي!، نه قورشاق ساللاماغا گئدردي! منه ده دئيردي گئتمه، نه‌ايسه، دئديييني باشا دوشمز ايديم! بير يول باجيمي گؤستره‌رك، دئدي: او تيخديغين يومورتالاردان بير دنه‌سيني بو صاغيرچا اوچون گتيرسه‌يدين؟ ائوره‌ن (عالم و دونيا) وئران اولاردي !؟.....
اوزون بير سوره، كيمسه‌دن سس چيخمادي، نه مندن، نه بؤيوگ‌آغادان، يان- يؤوره‌ميزده‌كي‌لر ده ماتير- ماتير باخيرديلار، بؤيوگ‌آغا اوركدن بير آه چكه‌رك، دولوخسوناراق باشيني آسمانا قالديريب، دئدي: تانريم...، سني آندا وئريرم اؤز بويوكلويونه، اوجور يازغي‌لاري هئچ كيمين آلنينا يازما...
تئز ال- آياغيني ايتيره‌رك!!، دئدي: تانريم مني باغيشلا- تانريم مني باغيشلا. سنين گيزلريندن(سرّلريندن)، سنين قورغو- قوراللاريندان بيزيم باشيميز چيخماز. سنين بيلدييين ياخشي‌دي. ايندي سنين كؤمه‌يين‌له، بيله‌ييمين سندن آلديغي گوجويله، آلنيمين تري‌يله، اؤز يئتنگ‌يمين سونوجوندا، بير پارچا حالال چؤره‌ييم وار. اگر ياشاييشيمدا قاپ-قاران گونلر گؤرموشم‌سه، ايندي آپ-آيدين گونلري، آياز-باياز گئجه‌لري ده گؤرورم.
دئديم: بؤيوگ‌آغا، سن كي بو قدر گؤزل دويورسان؟، نه‌دن يئري- گؤيو سيم- سيياه گؤرورسن!؟ اؤزونو آل قارشينا، سورغو- سيغابا چك، گؤر هئچ، بير دؤنه ساناجاغيندا دولانديريبسان كي، بوتون كؤمك ائدنلر اؤزلريني خالقين گؤزونه سوخماق اوچون، ثاواب قازانماق اوچون، گؤرون من نه قدر ياخشييام!!، دئمك اوچون، ائتمزلر؟
دئدي: ... نه بيليم ...! اگر ائله‌سي بير كؤمك ائدن تاپيلارسا دا، بؤيوك بير سامان آنباريندا، سامانلارين آراسيندا ايتميش جيققيلي بير ايگنه كيمي‌دير، اوتوز ايل آختارانين دا ايشي بوشونا، امه‌يي هئچه گئدر!
آنجاق...، اوزون بير قونوشمادان سونرا، دئديم: بؤيوگ‌آغا، گل بو قونونو باغلاياليم.
دئدي: نه قونوسو، نه سؤزو؟ من ايللر اؤنجه او قاراناق(شوم) گونلرين بوتونلويونو گؤمدوم(دفن ائتديم) گئتدي. كيمسه‌دن آلاجاغيم يوخ، كيمسه‌يه ده وئره‌جه‌ييم يوخ! اگر بيري اينسانليق گؤره‌ويني (وظيفه) يئرينه يئتيرمك اوچون بيزه كؤمك ائديبديرسه، بير قارشيليق اومماز، منجه او، تانري‌نين سئودييي بير قولودور. او دگرلي يارانميشا قارشيليق(عوض) گرك دييل. اؤزلريني رئكلام و تبليغ ائدنلر ده!، بلكه ايسته‌ديكلرينه قوووشوبلار. قالدي، ثاوابيندن اؤترو كؤمك ائدنلر، اونلار گئتسينلر قارشيليقلاريني آللاه‌دان آلسينلار، اما، او تانري و آللاه كي من تانيرام، منجه، اونون مصلحتي اييله، ائله‌سي آداملارين اللرينه ثاواب كي يوخ، دودوك!!! ده وئريلمز!
گؤنده ر
بؤلوم لر:
آذري