بو بايرام گؤزل بايرام اولدو. بيزيم بايرام بيزه بايرام گؤروشونه گلدي...
نهيه گولورسونوز؟! (بايرام گؤزل بايرام اولدو)، دئديييمه، يوخسا، بايرامين
بيزه بايرام گؤروشونه گلدييينه؟. اولسون كي، بيرينجي سؤزوم گولمهلي
اولسون!، نهايسه ايكينجي بؤلومه گولمهيين، دوغرودان بايرام بيزه بايرام
گؤروشونه گلدي
هه ... بابا ...! ، بايرام كيشيزادهني دئييرم. ساغ اولسون، ياخشي
گلدي- ياخشي اوتوردوق، ياخشي يئديك- ياخشيجا ايچديك
نهدي؟! يئنهده گولورسونوز؟. آ ... ها ... ء ...، بيلديم نهيه گولورسونوز.
(يئديك) منظوروم مئيوه- شيريني، فينديق- فيستيق ايدي. (ايچديك)
دئديكده، چاي- ماي! دئمك ايستهميشديم. بايرام گلدي، يئييب- ايچديكدن
سونرا، دئديم: بايرام ..، آخي .. مثلا ...، بايرامدي، بايرام گؤروشونه گليبسن.
او، شيرين سؤزلردن- فيلان ...؟
بايرام، دئدي: آخي ... هانسيني دئييم؟ هاميسيني بيليرسن... دا ...
دئديم: سن بير يئريندن باشلا. بيرينجي بو كي، هر بيريسيني دؤنه-
دؤنه ائشيتمهيه ارزيشي وار. ايكينجي ده بو كي، بير چوخونو اونوتموشام
گئديب ...!
بو ياندان دا بيزيم خانيم، سؤزومو كسيب، بويوردولار: بايرامقارداش، بيزيم
بو آغاميز، سؤزون دوزونو دئيير!. تزهليكده بير چوخ زادلاري اونودور!. سيز،
خاطيرهلرينيزدن بيريني سؤيلهيين.
بايرام اوزونو منه توتاراق، دئدي: شبيه چيخارانلارين قضيهسيني دئييم؟.
دئديم: هانسي شبيه چيخارانلار؟
بايرام، دئدي: باجي دوغرو دئييرميش!، سن چوخ اونوتقان اولوبسان.
تعزيه اوخويانلارين داستاني كؤيوموزده ديللر ازبريدي. نهتهر اونوتدون؟!
محرّمليكده كؤيه گلير، شبيه چيخارارديلار؟! اونلاري دئييرم ...
دئديم: ياديما گلمير ...
بايرام، دئدي: ياديندا دئييل؟، گئجه ياريسي اوشاقلارنان گئتديك شومورو
اؤلدورك؟!، اونو دئييرم ... دا ...!
دئديم: منيم ياديما گلمير. آللاه امواتينا رحمت ائيلهسين. من قاتيل- ماتيل
دئييلم. شومور- مومور ده تانيميرام!.
بايرام، چوخ چابا گؤستردي كي، بلكه منيم ياديما دوشسون، اولمادي! .
دئدي: آي باجي، (منظورو بيزيم خانيم ايدي) بير قوروپ تعزيه اوخويانلار وار
ايديلار تئز- تئز كؤيلره گلير شبيه چيخارارديلار. هر ايل محرّمليكده گلير بيزيم
كؤيده مدرسهدن يوخاري، قاراگؤله دؤنن يئرده چاتيرلاريني قورور، گوندوزلر
يان- يؤره كؤيلرده تعزيه اوخويور- گئجهلري ده اؤز چاتيرلاريندا سووارديلار. او
نئچهگون محرّمليكده خالقي او قدر آغلادارديلار كي، كؤيده ياشايان هر
كسي گؤروردون، گؤزلري قيپ- قيزميزي اولاردي. چوخدا كي آغلايانلارين
يوزده دوخساندوققوزو، محرّملييي الده بهانه ائديب اؤز دردلرينه آغلايارديلار!.
منده كي كيمسهنين آغلاماغيني گؤرمهيه دؤزمزديم، اؤزلليكله آنامي آغلار
گؤردوكده، اورهييم اوزولور- قيريلير، سانكي،دونيا باشيما آوار اولاردي، شبيه
اوخويانلارين اليندن زارا گلميشديم!. بير گون بيزيم بو منوشا!، دئديم: منوش،
گل بير تهر بو شبيه چيخارانلاري كؤيدن چيخاراليم.
منوش، دئدي: اده ...!، سن لاپ بئيله كافر اولوبسان؟!. شبيه
چيخارانلاري كؤيدن چيخارماق اولار مي!. هئچ اونلارا سايغيسيزليق اولار
مي؟! يوخسا بوندان دا داها پيسگونه قالماغيميزي ايستهييرسن؟ بو، چوخ
بؤيوك، همي ده باغيشلانيلماز بير گوناه اولار.
دئديم: بيرينجي، (اده ...) اؤزونسن!، ايكينجيسي ده، منوش هاچاندان
بري سايغي- مايغيني باشا دوشور؟ اوچونجو ده كي، بونلار، تكجه منيم
آنامي يوخ، بوتون بؤلگهنين آناسيني آغلاتماغا قرار وئريبلر.
آنجاق، منوش دا منيم سؤزومله راضيلاشدي، دئدي: بير گئجه گئديب
چاتيرلاريني اودا چكيب- آنالاريني آغلار قوياليم؟.
دئديم: نه او كي، باياقدان دئييردين گوناهدي، نه بو كي، دئييرسن:
چاتيرلاريني اودا چكهليم!. هئچ فيكيرلهشيرسن، چاتيرلار اودا چكيلسه،
اونلارين جانلاري- ماللاري تهلوكهيه دوشر؟. يوخ، من بونا راضي دئييلم. بير
نقشه ايشلهيهليم كي، فقط كؤيدن قاچماغا مجبور اولسونلار.
چوخ فيكيرلشديكدن سونرا، منوش، دئدي: بير يول تاپديم!، اؤزو ده ايكي
باشلي ثاواب!. اگر بير يول تاپيب بو، باجيسي ... ! شومورو اؤلدورسك، هم
خالق آغلاماقدان قورتولورلار همي ده آغاميزين اؤجونو بو كؤپئياوغلو- كؤپك
شوموردن آلميش اولاريق. دونيادا ثاواب!- عوقبادا ثاواب !
گئتديك، عاغيللي- باشلي(!) اوشاقلاردان دا بير نئچهسيني يولا
گتيرديك!. گئجهنين سون چاغلاريندا كؤيلولر يوخلاميش بير زاماندا ،
مدرسهنين ديواريندان بويلانيب باخديق- گؤردوك بالاجا چاتيرلارين
هاميسينين چيراغي سؤنوكدور. نهايسه بؤيوك چاتيردان كي اونلارين
يئييب- ايچمك يئرلري ايدي ايشيق گلير. شومورون چاتيريني اؤنجهدن
نيشانلاميشديق. ياواشجادان مدرسهنين ديواريندان آشديق، هر كسين ده
الينده اوراقدان- دهرهدن- بيچكدن- تييهدن! فيلان ...، شومورون چاتيرينا
ياخينلاشديق. منوش چاتيرين قاپيسي دئييلن يئرين پردهسيني آرالاديقدا،
گؤردوك يورغان- دؤشك يئرده، بوش! نهايسه شوموردن خبر يوخ. دئديم:
اوشاقلار، اولسون كي بونلار هاميسي او چيراق ايشيغي گلن بؤيوك
چاتيردا اوتوروبلار. ياوشجادان چاتيرا ياخينلاشديق، بيز چاتيرين ايچيني
گؤروردوك، چؤل قارانليق اولدوغوندان اونلار بيزي گؤرموردولر. چاتيردان
كاسئتده- ضبطصوتدا اوخويان بير آروادين سسي گليردي. ناواردا اوخويان
آروادين ديليني باشا دوشموردوك، نهايسه فارس لهجهسي كيمي بير
لهجهده، چوخدا قيرجانا- قيرجانا! اوخويوردو!. هر دؤنه آروادين سسي
كسيلديكده شبيه چيخارانلارين هرهسي بير سؤز دئييرديلر. بيري، دئدي:
جا ا ا ا ... ن ... سسيني يئييم!...
ديگر بير سس، دئدي: جا ااا ... ن ... جانيني ... يئييم!...
يئنه ده آرواد(كاسئت) اوخودو. بو دؤنه آروادين سسي كسيلديكده،
اونلارين بيريسي، دئدي: جا ااا ... ن ... ديلي ... ني ... يئييم!...
آنجاق، نؤوبهيله، دؤنه- دؤنه هرهسي ناوارداكي آروادين بير يئريني
يئييرديلر!، گولوردولر!...
شومور ، اوزونو يولداشلارينين هاميدان آغ ساققال اولانينا، شبيهده
ده آغا اولانا توتوب، دئدي: عموغلو، باغيشلا، سنين يانيندا آغزيميزدان
بو پيس سؤزلر چيخير!
او دا، شوموره، دئدي: آي بالام، سيز ايشيزده اولون !!
سونرا دا اؤز- اؤزونه، دئدي: گؤرن؟! بيزيم بو باباميز آداما! دئين يوخدو:
آخي سن؟ اكينچييدين؟! خيرمانچييدين؟!، آخي! بوغدا نهيينه لازيم؟!
ائربئله نئيمتلر اولان يئرده! گئتدين او زههر- ماهار! بوغداني تيخدين؟!
بيزي بو گيريف دونيادا- گيريفدار ائلهدين- بير لوقما چؤركدن اؤترو بو قدر
زحمتلرله توشباتوش ائلهدين؟!.
سونرا دا، آرتيردي: گونچيخاندان گئجهيهجن بوغازينيزي چيرمالاييب!
تر تؤكوبسوز!. ايندي كي باشا بئش باش چكيب حالا گليبسيز!، كئفيزده
اولون...
بايرام، نفسيني دريب- يئني بير ائنئرژي آلديقدان سونرا، دئدي: مني
باغيشلايين، ياديمدان چيخميشدي! دئمهديم. شبيه اوخويانلار هاميسي
دؤوره اوتورموشدولار، قاباقلاريندا كؤمورلري قيزارميش بير مانقال وار ايدي!
ايكي دنه ده بابامين تنمهكي! چوبوغو كيمي، شئي اللرينده دولانيردي.
او تنمهكي، چوبوغو كيمي شئيلري نؤوبهيله سوموروردولر!. اوشاقلاردان
هئچ بيريسي بيلمهدي اونلارين سوموردوكلري نهدير . منوشدان
سوروشدوم: بو نهتهر چوبوقدو؟ بونلار چكيرلر؟!
منوش، دئدي: ايشين اولماسين، سسيني ده چيخارما، بونلارين چكدييي
چوبوق دئييل، تيريههدي- تيريهههك!!. تئز جومون گئدههك!!.
دئديم: هارا گئدك؟! مگر شومورو اؤلدورمك اوچون گلمهديك؟، اونوتدون
كي دئييردين: دونيادا ثاواب!- عوقبادا ثاواب!
منوش، دئدي: نه ثاواب- ماوابي؟! نه شومور- مومورو؟! كورسان مي؟
گؤرمورسن، اونلار بيري- بيرييله قوهومدولار- يولداشديلار؟! . هرهسي ده
اؤز كئفلرينده؟! ...
٭٭٭
بايرام داستانا سون قويدو. ائويميزده بايرامين داستانينا گولن دن اولدو،
گولمهين ده!. اوزومو بايراما توتوب، سوروشدوم: بايرام...؟ ... ، آنجاق ....،
بيلمهديم، بيز بو دونيانين الينده اويونجاق اولدوق، يوخسا بو دونيا بيزيم
اويونجاغيميز اولدو؟!
بايرام، دئدي: من ده بيلميرم ...!. نهايسه، بير قونونو كسينليكله بيليرم.
بو كي، بوراسي اويون بازاريدير ......
