سايين ديلداشلار- قلمداشلار، بو يازي ايللر اؤنجه يازيلميش.بير نئچه نه‌دن‌له! وئب ياپراغيندا ياييلماسيني ايسته‌مزديم. آنجاق اوزون بير سوره خسته اولدوغومدان، سؤزون دوزو خسته يوخ آغير بير تيلبه‌ليك اوزوندن، ياتاغا دوشدويومدن يئني بير يازي يازاماديغيمدان، عريضه! بوش قالماسين دئيه، بو يازيني يايديم ...
----------------------
كوچه‌ميزده پروانه آدلي بير خانيم وار. اونون، محله ده باش وئرميش هر
ايشدن خبري اولار. محله‌ني كؤي- كؤي، كوچه- كوچه، ائو- ائو، آداملاري بير
به بير تانييار. ائولرده هر سؤز اولارسا، ساو-سيز(خبرسيز) اولماز.
اينانمازسينيزدا اؤزونوز بيلرسينيز! قومشولار، ائولرينده نه‌يئيرلر- نه‌ايچرلر،
هاچان ياتارلار- هاچان دورارلار، هانسي ائوده نه‌لر اوسته ساواش دوشرسه!
قومشولارين اؤزل ياشاملاريندا هر نه گيز(سّر) وارديرسا، بوتونلويونو بيلر.
هاردان آراشديرار، هاردان بيلر- نه تهر بيلر، اؤزو بيلسين، اؤز آللاهي. تكجه
بو دئييل، بيردن ده گؤردون، باش وئرميش، بالاجا و اؤنمسيز بير اولايا
(حادثه‌يه) او قدر قول- بوداق وئرر، ساده‌جه بير سؤزدن، «90بؤلوملو بير
سئريال!» جورله‌ير. اؤرنك اوچون اونلاردان بيريسيني سيزه دئييم: بير آغشام
چاغي ايش يئريندن، ائوه دؤندويومده، كؤيوموزده، «بيلميرم نه‌دن!، خيياوانا
كؤي دئييرم، بلكه ده اوندان ديركي، ائشيتميشم بو اؤلكه‌ده بيرينجي قير
قوم، آسفالت اولموش جادا، تبريزده (خيياوا- مئشگينه) گئدن جادا ايميش،
جاد اؤزو ده توروكجه سؤزدور، بركيميش هر نه‌يه جاد دئييرلر، بلكه‌ده جادا،
يئترينجه تاپدالانميش- بركيميش يول دئمك‌دير، اونا گؤره ده هر يئرده داش‌قوم
تؤكولموش، تاپدالانميش يوللارا جادا دئميشلر، قير قوم اولموش جادا، خيياو
جاداسي كيمي اولوب، دئيه، قير قوم- آسفالت كؤي‌لره خيياوان دئييلير».
آنجاق، اوزاقدان گؤردوم، كاظيمين ماغازاسي‌نين اؤنونده چوخلو آدام
توپلاشيب. چيغير، باغير سسي ده گلير. ماغازالارين، ائولرين قاپيسي‌نين
قاباغيندا دوروب باخانلارين دا، سايي آز دئييلدي. بيريسيندن سوروشدوم:
اورادا نه اولوب؟
دئدي: دئيه‌سن بير نفردي، ائيله ده هوش- باشي يئرينده دئييل، دلي
كيمي‌دي، او، گئدير، قوهوملاريندان، زاددان، ايسته‌ييرلر اونو ائوينه
قايتارسينلار، گئديب، اؤزونه يا باشقاسينا بير يارامازليق يئتيرمه‌سين. اودا
دوشونمور، چيغير- باغير ساليب.
كوچه‌ميزه ساري يولا دوشدوم. كوچه‌نين تين‌يندن (نبش‌يندن) دؤنه‌رك،
بيردن- بيره سانكي، كاميون منه چارپدي. بيرآزدان اؤزومه گله‌رك، گؤردوم،
يئره ييخيلميشام. آياق اوسته دوراراق، پالتارلاريمين توز- موزونو چيرپاراق
باشا دوشدوم، چاققيشديغيم! پروانه خانيم ايميش. اودا يان‌پؤرتو دوشوب
آريق‌ين(آرخين) ايچينه. يازيق، او هاي- هوي‌‌دا اؤزونو اونودوب، اؤز ديللري
اييله (فارسجا!) دئييردي: آغا منوچهر باغيشلايين، عجله اييله گئتديييمه گؤره
بئله‌سي اولدو.
دئديم: آللاه باغيشلاسين...!، آللاه باغيشلاسين!! «آخي، بيزده، آللاه
باغيشلاسين، آللاه جانيني آلسين، يئرينه ده ايشله‌نر!!».
آريق‌ين ايچينده چيرپيناراق، گؤزو اييله، كاظيمين ماغازاسي اولان يؤنه
ايشاره ائديب سوروشدو: آغا منوچهر اورادا نه‌اولوب؟
بيليرديم، هر نه دئسم اؤنمي يوخدور، او، اؤزو ايسته‌ديييني دوشونه‌جك‌دير.
جانيمي قورتاريم دئيه، قيسيتلي(محدود) بير نئچه سؤز اييله، دئديم: بير
كيشي‌دي گئدير نئچه كيشي ده اونا، گئتمه، دئييرلر.
آنجاق، گؤردوم، پروانه خانيما دا هئچ بير جور كؤمك ائده بيلمه‌يه‌جه‌يم. بونا
گؤره كي بوراسي‌نين اؤزو اوچون اؤزل قوراللاري وار!. او، بؤيرو اوسته
آريق‌ين ايچينده چيرپينيردي، من، گئتديم. قاپيميزي آچيب، ايچه‌ري كئچيب،
باشماقلاريمي چيخارماق ايسته‌ديييمده، خانيم بويوردو: باغيشلا، قاييت گئت
بير بالاجا پوتلوق نوباتي ياغ آل، گتير، ياغيميز قورتاريب.
پروانه خانيم‌دان اوره‌ييم دولو اولدوغونا گؤره!، دئديم: سنه دئميشم، پروانه
خانيما تاپشير!، بيزيم ائوده، ات- ياغ- فيلان ... قورتارمادان خبر وئرسين،
سيراسيندا آليب گتيريم!
خانيم قاش قاباغيني دويونله‌يه‌رك، ساغ الينين ايشاره بارماغي اييلا، كوچه
قاپيسيني گؤستريب، دئدي: ياخشي- ياخشي!، اتي‌آجيليغين توتماسين،
بوش- بوش‌دا قونوشما!، يورو تئز آل، گل.
دئديم: بويوروق(دستور) بويورون ژئنرال! ائودن چيخديم، گؤردوم نئچه خانيم،
پروانه خانيمي آريغين ايچيندن چيخاريبلار، او دا پوزغون حالدا، دووارا
سؤيكنه‌رك، قيچلاريني دا ياياق(پييادا) يولونون ائنينه اوزاديب، اوتوروب
دؤوره‌سينه توپلانميش خانيملارا دئيير: قيزلار...! آللاه قاوات‌ين(كافرين) بالاسينا
دا، گؤسترمه‌سين، آشاغا كوچه‌ده، بير نفرين، بير افغانا اوره‌يي يانيب. اونو،
ائولريني تميزلمه‌يه گتيريب، ايسته‌ييرميش بير جور افغانلييا كؤمك ائله‌سين،
او، لووا قالميش افغان دا، توفنگي اييله ائو اييه‌سين، عاييله‌سين، قونوقلارين،
اون ايكي نفري اؤلدوروب؛ ائوده‌كي پول- مول، قيزيل- ميزيل، هرنه دگرلي
خيريم- خيردا شئي‌لري گؤتوروب آپاريرميش، آللاها شوكور كي، قومشولار اونو
توتوبلار.
خانيملارين بيريسي، پروانه خانيما دئدي: آي قيز! آخي سن كي، جوبا
ييخيلميشدين، اورا دا گئده‌بيلمه‌ييبسن، هاردان بيلدين؟!
پروانه خانيم دئدي: واي... باشيما كوللر... ! دئمه‌لي من يالان دئييرم...!؟
اينانميرسان گئت آغا منوچهردن خبر آل، بونلارين هاميسيني، آغا منوچهر
دئييردي.
گؤنده ر
بؤلوم لر:
آذري