يارپاقلار تيتره‌سه بيل كي، سسيمدير،
سنه پيچيلدارام "وار اول عزيزيم"
سنين وارليغين دا منيم بسيمدير،
ائله وارليغينچون ساغ اول، عزيزيم...
اولان اولوب گئچن گئچيب بلكه ده،
ايندي داها كؤورلمگين يئري يوخ،
عؤمروم بويو بئله گليب منيمكي،
اوليندن بيري واردي، بيري يوخ.
اوزاقدايدي من ايسته‌ين اوجاقلار،
اورگيمدن گليب گئچدي سازاقلار،
آتالي ايدي،آنالي ايدي اوشاقلار،
بيزيم ائوده بيري واردي، بيري يوخ.
گؤزلريمه دولدورموشام ياغيشي،
بير كؤينكده چيخارميشام من قيشي.
شالوار-پئنجك گئيينردي تاي-توشوم،
منده ايسه بيري واردي، بيري يوخ.
قلبيم ياندي ايلك سئوگيمدن،عشقيمدن،
دارا دوشدوم ال اومماديم هئچ كيمدن،
مجليسلرده جان دئييب،جان ائشيدن
دوستلاريمدان بيري واردي، بيري يوخ.
اوزوم گولدو طلبه‌يم دئينده،
سيخيليرديم دوست پئنجگي گئينده،
معليمله ديل تاپا بيلمه‌ينده،
قيمتيمين بيري واردي، بيري يوخ.
من اوردويا نه‌لر قويوب گئتميشديم،
اورك آليب، اورك قيريب گئتميشديم،
ايكي قيزا كؤنول وئريب گئتميشديم،
قاييداندا بيري واردي، بيري يوخ.
اوزاق گزدي عمي، دايي،بيبي‌لر،
سؤز آراسي منه ائولن دئديلر،
نيشان اوچون ايكي شئي ايسته‌ديلر،
منده ايسه بيري واردي، بيري يوخ.
واخت گله‌جك بو گونو گؤره‌جكسن،
چوخ سوالا گؤزونو دؤيه‌جكسن،
واخت گله‌جك،سن اؤزون دئيه‌جكسن،
دئيه‌جكسن بيري واردي، بيري يوخ.
نصرت كسمنلي
گؤنده ر
بؤلوم لر:
شعر آذري