بو سئوگيدن سن قورخورسان، عيبي يوخ
من سئوهرم ايكيميزين يئرينه
بو عشق اوچون بير گون دارا چكسهلر،
من گئدهرم ايكيميزين يئرينه.
مين عذابدير سنسيز گئچن هر گونوم
اونوتموشام ياخشي يامان فرقيني
بو سئوگينين داغ اريدن درديني،
من چكهرم ايكيميزين يئرينه.
گول دئييرم، گول قلبينه دگيرم
من سنينچون تانري يازان شعرم
دوداقلارين اينجيمهسين دئييرم،
من اؤپهرم ايكيميزين يئرينه.
طالعيمده سون آچيلان گولومسن،
سوزوب قارا گؤزلريني،گولومسه!
بو سئوگينين سونو اگر اؤلومسه،
من اؤلهرم ايكيميزين يئرينه
نصرت كسمنلي
