آذري 15 -جو سايي (ائل ديلي و ادبياتي درگيسي 22-جي سايي) 1386-جي ايل
ناغيل دئيه‌ن : حسين كريمي زنجان- چيلاندار كندي -40 ياشلي- ساواد: قوران اوْخوماق
ثبت ائدن : رضاعلي كريمي
يئر: زنجان- چيلاندار كندي
تاريخ: 24/ 9/ 1385
بيري وار ايدي بيري يوْخ ايدي. آللاهدان ساواي كيمسه يوْخ ايدي. بير كيشي‌نين اوچ اوْغلو مليك احمد، مليك محمد، مليك جمشيد آديندا و اوچ قيزي وار ايدي كي، اوْنلاري دئوزادلارا اره وئرميشدي. بير گون كيشي اوْغلانلارينا دئدي من اؤلنده مني مينديرين دوه‌يه هر ياندا دوه سيديك آتسا مني اوْردا قويلايـين. بير ده اوچ گئجه بؤيوكدن كيچيييه منيم قبريمه نيگهبانليق وئرين. بير موددت كئچدي كيشي دونيادان گئتدي بونو اؤزو دئين كيمي دوه‌يه مينديرديلر بير موددت يوْل گئتديلر بير يئرده دوه سيديك آتدي كيشي‌ني دوه‌دن انديريب اوْردا قويلاديلار. گئجه اوْلدو اوّل مليك احمد نيگهبان قالدي آما ياري گئجه يوخولادي. مليك جمشيد گلدي گؤردو مليك احمد ياتيب آما بير دنه آغ دئو گلير. دئو گلدي چاتدي. مليك جمشيده دئدي: آي آدام‌زاد سيز آتانيزي نييه گتيريبسيز منيم يوردومدا قويلاييبسيز؟
مليك جمشيد دئدي: داي قانشارا گلمه وورارام اؤلرسن.
دئو سؤزه باخمادي گلدي. مليك جمشيد قيلينج ايله ووردو دئو اؤلدو. دئوين ليباسلارين چيخارتدي آتين مينيب گتيردي بير آيري يئرده گيزلتدي. اوْندان سوْنراكي گئجه مليك محمدين نؤوبه‌سي ايدي نيگهبانليق وئرسين. گئتدي قبرين يانينا گئجه مليك جمشيد گئتدي گؤردو مليك محمد ياتيب بير دنه قارا دئو گلير. دئو گلدي چاتدي ملك جمشيده. مليك جمشيد دئدي داي قانشارا گلمه وورارام اؤلرسن دئو باخمادي گلدي. مليك جمشيد ووردو بو دئو ده اؤلدو. ليباسلارين چيخارتدي آتين مينيب گتيردي همن‌كي يئرده گيزلتدي. آخير گئجه اؤز نؤوبه‌سي اوْلدو چون بيليردي دئولر گئجه ياريسيندان اوْ يانا گلير اوّل ياتدي. گئجه ياريسي دوردو بير موددتدن سوْنرا گؤردو بير قيرميزي دئو گلير. مليك جمشيد دئوه دئدي ياخينا گلمه. دئو باخمادي گلدي. مليك جمشيد ووردو بونو دا اؤلدوردو. ليباسلارين چيخارديب آتين مينيب گتيردي اوْ بيريسي‌لرين يانيندا گيزلتدي.
بونلارين اؤلكه‌سينده اوچ باجي‌نين دريانـين آراسيندا ائولري واريدي. قيزلار شهرين اهلينه دئميشدي: هر كس دريادان كئچه اوْنون آراسيندا تره‌زي‌نين ايچينده آتين قمچي‌سي ايله آلماني ايكي بؤله بيز اوْنلارا گئده‌جه‌ييك.
مليك جمشيدين قارداشلاري بو سؤزو ائشيديب يوْلا دوشدولر. مليك جمشيد ده يالاندان بونلارين دالييجا آغلادي بونودا آپارالار. قارداشلاري دئدي: سن بيزدن اوشاقسان سن اوْردا آياق آلتدا اؤلرسن- آپارماديلار. آمما مليك جمشيد گئديب گيزلتدييي آغ كوْت- شالواري گئييب آغ آتي مينيب گلدي قارداشلاريني دا يوْلدا كئچدي. اوْنلار دا هئچ بونو تانيمادي. بير قمچي ووردو سويو كئچدي بير قمچي ده ووروب آلماني تره‌زي‌نين ايچينده ايكي بؤلدو. بؤيوك قيزي گؤتوروب گتيردي. همن‌كي يئرده گيزلتدي. گلدي ائوه قارداشلارينا دئدي نه اوْلدو؟ قارداشلاري دئدي: بير آغ آتلي گلدي بيزه ماجال وئرمه‌دي.
مليك احمد ايله، مليك محمد صوبح تئزدن يوْلا دوشدولر. مليك جمشيد يئنه دئدي بونو آپارماديلار. آمما بونلاردان سوْنرا گئديب قارا كوْت- شالواري گئييب قارا آتي ميندي يوْلا دوشدو. يئنه كئچن يوْل كيمي آرا قيزي گتيريب گيزلتدي. گئجه مليك احمد، مليك محمد ايله قرار قوردو صوبح لاپ تئزدن يوخودان دوروب يوْلا دوشدولر. آمما بو دفه مليك جمشيد قيرميزي كوْت -شالواري گئييب قيرميزي آتي مينيب گئتدي. كيچيك قيزي دا گتيردي گيزلتدي. جاماعات هاميسي حئيران قالميشدي. قارداشلاري دا گلدي ائوه. مليك جمشيد دئدي اوْ قيزلارين اوچون ده من گتيرديم. بؤيوك قيز مليك احمدين، آرا قيز مليك محمدين، كيچيك قيز دا منيم. آمما من يامان يوْرغونام سيز نيگهبانليق وئرين من بير آز ياتيرام. مليك جمشيد ياتدي اوچ ساققاللي كؤسسه گلدي مليك احمدين، مليك محمدين قوْللارين باغلادي مليك جمشيدين آروادين آپاردي.
مليك جمشيد بير موددتدن سوْنرا دوردو دئدي: بس منيم آرواديم هاردا؟
دئديلر اوچ ساققاللي كؤسسه گلدي آپاردي.
يوْلا دوشدو بير موددت يوْل گئتدي. بؤيوك باجيسينين ائوينه يئتيشدي. باجيسي دئدي بورا نييه گليبسن ايندي دئو گلر سني اؤلدورر. بير ويرد اوْخودو اوْنو شوكولات ائيله‌دي قوْيدو جيبينه. دئو گلدي دئدي «آدام، آدام‌زاد ايييسي گلير، شاققيلي بادام‌زاد ايييسي گلير». آروادي دئدي: يئميشسن ديشين ديبيندن گلير.
دئو ناراحات اوْلدو دئدي: دئييرسن يا اؤلدوروم؟
دئدي: يوْخ وورما قارداشيمدي.
بير ويرد اوْخودو قارداشي بؤيودو. دئو دئدي: ايشين نه‌دي؟ دئدي: «اوچ ساققاللي كؤسسه» آرواديمي آپاريب.
دئو دئدي: كاش تئز دئيه‌يدين داي منيم ماحاليمدان چيخيب گئديب. هئچ زاد ائله‌مك اوْلماز.
يوْلا دوشدو گلدي آرا باجيسينين ائوينه. باجيسينين اري دئدي: كاش تئر گله‌يدين اوْ منيم ماحاليمدان چيخيب گئديب. داي هئچ زاد ائله‌يه بيلمم.
اوْردان دا يوْلا دوشدو گئتدي كيچيك باجيسينين ارينين يانينا. اوْ دا دئدي: بوردان گئديب آمما سن گئت بير آز پامبيق، بير آز كيشميش آل آپار آت دريايا سو آتي‌لاري اوچون. اوْنلارين آناسي گلر سنه دئير نه ايشين وار. اوْندا دئيه‌رسن بو جور. اوْ سنه اوچ ساققاللي كؤسسه‌نين يئرين دئير.
مليك جمشيد گلدي بير آز پامبيق، بير آز كيشميش آلدي گتيردي آتدي دريايا. آتلارين آناسي گلدي دئدي: ايشين نه‌دي؟
دئدي: اوچ ساققاللي كؤسسه‌نين يئرين منه دئيين.
كؤسسه‌نين يئرين دئدي. بير دنه ده قيلينج وئردي. دئدي: سنين قيلينجين اوْنو اؤلدورمز بو قيلينج ايله اؤلدور.
قيلينجي آليب يوْلا دوشدو. بير موددت يوْل گلدي كؤسسه‌نين ائوينه يئتيشدي. چيخدي باجادان باخدي. گؤردو آروادي‌نين ديزي اوستونده ياتيب، يامان ناراحات اوْلدو. اندي گلدي آشاغي آت وئرن قيلينج ايله ووردو كؤسسه‌ني اؤلدوردو. آروادين گؤتوروب گلدي. هر باجيسينين ائوينده بير قده‌ر قالدي. آخيردا گلدي اؤز شهرلرينده قارداشلاري‌نين يانينا.
گؤنده ر
بؤلوم لر:
آذري