آذري 3-جو سايي (ائل ديلي و ادبياتي درگيسي 10-جو سايي) 1382-جي ايل
ائشيتديكلريميزه گؤره بئله دئييرلر كي, تبريزين ارك قالاسينـين مالاتـيندا يومورتا و كولدن ايستيفاده اوْلونوب. بو قدهر مؤحكم اوْلماغي دا اوْندان اوْلوب و بو گونه قدهر داواملي دوروب. اوْنون دوزهليشينه گؤره گؤزل بير ناغيل واردي :
دئييرلر كي, اركي دوزلدن زامان اوْردا بير ايشلهين وار ايميش كي, يئردن تك جانـينا اوْ اوجاليقدا ديوارلار اوسته ايشلهينلره كرپيج آتاردي ! بوايشچينين بو قدهر گوجلي اوْلماغينـين سببي بو ايدي كي, اوْنون بير آروادي وار ايدي كي آخشام باشلاري اري ايشدن دؤنندن سوْنرا اوْنا اوْ قدهر حؤرمت ائدردي كي, كيشينين بوتون يوْرغونلوغو جانـيندان چيخاردي و اصلن هئچ بير يوْرغونلوق بيلمزدي. بئلهليكله اركين ديوارلاري اوجالاركن ،گونلرين بير گونو علي شاه وزيري ايله بيرليكده اركين ايشينه باش چكمك اوچون اركه گئدهرلر. اوْرادا ايشه باخاركن شاهين گؤزو كرپيج آتان ايشلهينه دوشر و اوْنون بو قدهر گوجلو اوْلدوغوندان تعجوبلنيب، وزيريندن بو ايشين سيرريني سوْروشدو. وزير ده, بيليردي اوْنون بو قدهر گوجلو اوْلماغـينـين سببي اوْنون آروادينداندي، سببي شاها سؤيلهدي و دئدي كي: قيبله-ي عالم ساغ اوْلسون سؤزون دوزو، دوزون سؤزو, بو كيشينين بير آروادي واردي كي, ايشدن سوْنرا اوْنا اوْ قدهر ياخشيليق ائدهر كي, اوْنون كؤنلونه گؤره بو قدهر ياخشي ايشلهر. شاهين آغزي سولانـيب وزيرينه دئدي ايندي كي, بونون بئله بير ياخشي آروادي وار نه ياخشي كي اوْنو آليم اؤزوم اوچون. بئله بير آروادين اينانميرام دونيادا تايي اوْلموش اوْلا.
شاه وزيريني گؤندردي آروادي راضي ائلهسين تا اوْنونلا ائولنسين؛ وزير ده گئديب آروادين يانـينا اوْنو راضي ائلهدي كي, شاهنان ائولنسين،آرواد دا سئوينجك دوشوب اؤز كؤنلونده آرزيلار قورماغا باشلادي. گئجه اري ائوه گلديكده، آرواد ارين هئچ حئسابا قوْيمايـيب, اصلن اوْنا قوللوق دا ائلهمهدي. كيشي بو ايشدن شاشيريب، آرواديندان اوْنا نهدن قوللوق ائتمهمهسيني سوْروشدو. آرواد دا اؤزون توتوب ريشخندنن دئدي: آ كيشي! نه زاماناجان سنه حؤرمت ائلهيهجيم. بو گون باش وزير مني شاهين آروادي اوْلماغـيمي ايستهدي!
كيشي گؤردو كي, اليندن هئچ بير ايش گلمير باشين قوْيوب ياتدي. سحر ايشه گئديب باشلادي ايشلمهيه, آمما نه قدهر چاليشدي ائلهيه بيلمهدي حتّا بيركرپيج ده يوخاري آتسين. اوستدهكي بننا ائنيب نهدن ايشلهيه بيلمهمهييني سوْروشدو. كيشي ده جاوابيندا دئدي كي: سؤزون دوزو؛ دوزون سؤزو, گئجه ائوه گئتديكدن سوْنرا بيلديم كي, آرواد مندن ال اوزوب و داها ايستهمير مننن ياشاسين. اوْنا گؤره ده منيم ده اصلن ال- قوْلوم ايشلمهيه گلمير, قالميشام نه ائديم؟ اوستا مئعمار چوْخ هوشلو- باشلي بير كيشي ايدي, دئدي: هن! من سنه بير يوْل اؤيرديب بو ايشي دوزلدهرم، سن من دئدييـيمي ائله اوْندان سوْنرا گؤرهرسن كي, آرواد سني بيرداها قوْيوب گئـتمك ايستهمز.
اوستا مئعمار اوْنا بير اؤيود وئريب يوْلا سالدي. كيشي ائوه دؤندوكدن سوْنرا اوستاسي اؤيرتدييي ايشه اوز قوْيدو. ائوه يـئـتيشهركن دوز گئديب ماوالدا اوْتوردو، بيرآز سوْنراسي دا ماوالداكي لولئـيـيني گؤتوروب سينديردي و باشلادي آغلاماغا كي, ائي واي لولئـيـينيم سيندي. بوندان سوْنرا من نئـيلهمهليـيم؟ باشيما نه كول تؤكهجهيم؟ ائي داد! ائي واي !
آرواد اؤزونو ماوالا يـئـتيريب كيشييه دئدي: آ كيشي نه هاي-كوي ساليبسان بير لولئـيـيندن اؤترو بو قدهر اؤزونو پريشان ائلهمه. مگر بوندان ساواي داي بير آيري لولئـيـين يوْخدو؟ كيشي آغلايا- آغلايا دئدي: آخي بيلميرسن كي, من بونـئچه ايلي بو لولئـيـينه نه جور عادت ائـتميشيديم! بيليرديم اوْنا نه قدهر سو تؤكوم. بوندان سوْنرا نه جور اوْلار من آيري بير لولئـيـين تاپيب اوْنا عادت ائديم.!
بو سؤز آرواددا ائله اثر قوْيدو كي, كيشيسينين نه دئديييني آنلادي و دوشوندو كي, من بو قدهر ايللر بو كيشيله ياشايـيب عؤمور سورموشم. بوندان سوْنرا نه جور اوْلار من گئديب اؤزگه كيشيله، شاه دا اوْلموش اوْلسا, نه جور ياشاياجاغام؟ ياخشيسي بودور كي, ائله بوننان عؤمور سوروب ياشايام.
بئلهليكله آروادين آغلي باشينا گليب اريلن شيرين- شيرين ياشايـيش سوروب ارك قالاسي تيكيلدي.
گؤنده ر
بؤلوم لر:
آذربايجان