آذري 16 -جو سايي (ائل ديلي و ادبياتي درگيسي 23-جي سايي) 1386-جي ايل
عزيزيم كاسا دوْلماز
مرد الي كاساد اوْلماز
يوز نامردين چؤره‌يين
دوْغراسان كاسا دوْلماز
***
اينگيليس ايمانسيز
ايتاليا قورانسيز
بيزه اينه وئرمه‌سه
بيز قالاريق تومانسيز
***
قيزيل اينه ساپلانماز
آتارام اوْدا يانماز
دئسم باشيم آغرييـير
ياد اوغلودور اينانماز
***
دامدان داما داميميز
قوْشادير ائيوانـيميز
سن اوْردان گل، من بوردان
كؤر اوْلسون دوشمانـيميز
***
چاي قيراغي بيچيلمز
سويو درين گئچيلمز
بير جاندان ، بيرده ياردان
شيرينليكدن گئچيلمز
***
گليرديم ياواش ياواش
آياغيما گلدي داش
سندن منه يار اوْلماز
گل اوْلاق باجي قارداش
***
سو درين‌دي گئچيلمز
بولانليقدي ايچيلمز
دئـييرله ياريندان گئچ
يار شيريندي گئچيلمز
***
عزيزيم بولاريميش
ايچمه‌لي سولاريميش
عئزراييلين آدي پيس
جان آلان يوْللاريميش
***
باشيندا گؤموش سانجاق
گئديردي بير يار آنجاق
دئديم بو اوجا بوْي يار
گؤره‌ن منيم اوْلاجاق
***
قيزيل اوزوك دار بارماق
سؤزلرين بال، ديل قايماق
سئوگي‌لرين حاققي‌دير
كؤنول تاپشيريب آلماق
***
قالادان انديم آنجاق
باشيمدان ساري سانجاق
نه قيز اوْلدوم، نه گلين!
اوْدلارا يانديم آنجاق
***
قيزيل اوزوك دار بارماق
اؤيره‌نيرم تار چالماق
منيم نه واختيم ايدي
بوْشانـيب ائوده قالماق
***
آلمالار بوداق بوداق
يارانديق بيز، قم اوتاق
نئيله‌ميشديم، كؤسموسن؟
نه ائيله‌ييم باريشاق
***
توت آغاجيندا يارپاق
توتو وار بارماق، بارماق
يالاندي ياردان دوْيماق
آغيز سوت، دوْداق قايماق
***
دووار اوستو پيتـيراق
قيزلار گلين اوْتوراق
اوْتورماقدان نه چيخار؟
گلين اوْلاق قورتولاق
***
من ياري گؤردوم باياق
الينده ساري داراق
قاچديم توتا بيلمه‌ديم
سيناسان بئله آياق
***
توت آغاجي پيتـيراق
چادير چالاق اوْتوراق
بيرين سن دئه، بيرين من
قوْي بو قمدن قورتولاق
***
آبي پاچين، گوي داراق
ياريمي گوردوم باياق
قاچديم چاتا بيلمه‌ديم
سينايدي بئله آياق
گؤنده ر
بؤلوم لر:
آذري