آذري 6 جو سايي (ائل ديلي و ادبياتي درگيسي 13-جو سايي) 1383-جي ايل
يانيلتماج بير چوْخ فرقلي آدلارلا تورك فوْلكلوْروندا يـئر آلميش يانـيلتماجلار اوشاقلارين ديل باجاريقلاريني گئنيشلتمك و اوشاقلارين بير- بيرلريني سيناغا چكيب, ايلنجه و گولمه‌جه ياراتماق آماجيله دئـييلن سؤزلردير و بير سيرا ياخـين حرفلري و دال با دال سؤيله‌ننده دئمهيي چتين اوْلان سؤزلرين دئمهييندن اوْرتايا گلير.
بو سؤزلر بير جومله شكلينده يا دا بير تكرارلاما حالـيندا دئـييلير و چوْخلو نومونه‌لري واردير، جومله شكلينده اوْلان حالدا اوْنلاري بير نئچه دفه تـكرارلاما گرهكير. يانيلتماجلار سؤيلهييشي چتين اوْلان تكرارلامالارديلار كي, بعضن يازيلي حالدا بئله اوْنلاري اوْخوماق چتين اوْلور.
«يانـيلتماج», «يانيلماجا», «ياهالتماجا», «شاشيرتماجا», «تكرارلاما» و «تكرله‌مه»لر توركلرين آراسيندا تانـينميش اوشاق فوْلكلوْرو قوْللاريندان بيري اوْلدوغو حالدا، سؤز اوْيونو كيمي ده بؤيوكلرين ياراديجـيقلاريـندا، اؤزلليكله داستانلاردا و اويدورمالاردا گؤرونور.
- آتي مين ايتي قوْو, ايتي مين آتي قوْو.
- آدام معدنه گئتميش، معدنده بادام يـئميش، مادام كي, معدنده بادام يـئميش، بس نييه بيزه وئرمه‌ميش؟
- آشپاز عاباس آش آسميش, ياخشي آسميش، خوْش آسميش.
- آشپاز عاباس بوْزباش آسار، اوْباشدا بوباشدا.
- آغ بال قاباق, بوْز بال قاباق, بوْز بال قاباق, آغ بال قاباق.
- آل بو تاققاتوقلاري تاققاتوقچويا تاققاتوقلانمايا گؤتور، اگر تاققاتوقلاري تاققاتوقچو تاققالاماسا، تاققاتوقلاري تاققاتوقچودان تاققاتوقلاتمادان گؤتور گتير.
- آي آخساق آشپاز حسن شاه! آشپازلار آش بيشيريرلر سن ده گل آش بيشير آي آشپاز حسن شاه.
- ائل- عالم آل دانا آلدي آلدانديلار، بيز بير آل دانا آليب آلدانماديق.
- ائللر مزه‌لنميشده بيز مزه‌لنمه‌ميشيك مگر؟
- ال- اوزوموزو يوياق، اوزوموموزو يئـيهك, اوزوموموزو يئـيهك، ال اوزوموزو يوياق؟
- ايت ايتي ايتير، بيت ايتي ايتير، ايت بيتي ايتير، ايت گئتدي، بيت گئتدي، ايت بيت گئتدي.
- بازاردا نه اوجوز؟ ميس اوجوز, دوز اوجوز, كونجود اوجوز.
- بو ائششك، اسكي ائششك.
- بو اليمده كي تسبئح، عمامهلهنمهليمي، عمامهلهنمهمهليمي؟
- بوْز آتين بوْز توْرباسين بوْش آس باشيندان, آپار ايسلات ياش آس باشيندان .
- بو قارا قانتار قيرخ كيلوْ قارا قاتران دارتار.
- بو قارپيز دا قارين سانجيلانديرانلاردانميش.
- بو كاسا بيزيم اؤزوموزونوموش.
- بو كؤشه ياز كؤشه‌سي، بو كؤشه قيش كؤشه‌سي، اوْرتادا سو شوشه‌سي.
- بو گون چرشنبه آخشاميدير، چرشنبه آخشاملاشيرسان گل چرشنبه آخشاملاشاق، چرشنبه آخشاملاشميرسان چرشنبه آخشاملاشماياق.
- بو مومچونون مومو عومومي مومدور.
- بو ميس چوْخ پيس ميسميش, بو ميسين جينسي پيسميش, بو ميس كاشان ميسيايميش.
- بو يوْغورتو ساريمساقلاساق دا يئسهك، ساريمساقلاماساق دا يئسهك
- بو يوْغوردو مايالاييب ساخلاساق دا، مايالاماييب ساخلاساق دا؟
- بير ايكيدير بير ايكي, بئش آلتيًدير بئش آلتي, اينانميسان ساي دا باخ, اوْن آلتيًدير اوْن آلتي.
- بير پينه‌چي، بيرينجي دفه بير نئچه باشماغي بير- بيرلرينه اينجي كيمي پينه‌دي.
- بيزه اوچ آد بلليدي/شكرليدي بالليدي/ علي، ولي، پيرعلي/ محمد اوْندان ايره‌لي/ فينديقيستان، قازيستان/ رحمتليك سنين آتان/ فاطما، توكزبان/ زوبئيده، بير جان/ توكزبان دئيير/ فاطما هئي يئـيير/ فاطما توكزبان/ قاريشدي هر يان/ كيشنهدي گؤيلر/ داغيلدي ائولر/ فاطما توكزبان/ ايكيسي بير بوْيدا/ فاطما دالاشدي/ زوبئيده قاچدي/ باريدان آشدي/ چارخا دوْلاشدئ/ تنديره دوشدو.
- بيزه بيزده بيز دئيهرلر، سيزده بيزه نه دئيهرلر؟
- تامارزيلي توْپال شاعبان، ياتار چاتار ساتار سامان.
- جومه گونو جومه مچيدده جووللر جوولي جابارين جيبلريندن جوبللرين جوبوتدولر.
- حاققي حاققينـين حاققيني ايسته‌دي، حاققي حاققينـين حاققيني وئرمه‌دي، حاققي دا حاققينـين حاققيندان گلميش
- حاققي حاققينين حاققيني يئميش، حاققي حاققي‌دان حاكيمه شيكايت ائتميش، حاكيم حاققييا حاققيني وئرمه‌ميش، حاققي دا حاققينـين حاققيندان كئچميش
- حاقلي حاقلينـين حاققينـي يئميش, حاقلي حاقليدان حاققين ايسته‌ميش حاقلي حاققينـين حاققينـي وئرمه‌ميش,حاقليدا حاققينـي حاقدان آلميش
- حاوا خالا، تندير قالا، كوْسوْوو گؤتور، مني قوْوالا
- دال سارخار قارتال قالخار، قارتال قالخار دال سارخار
- دئدي دو(ر) دا نه دورموسان
- دييرمانا گيردي كؤپك، دييرمانچيدان يئدي كؤتك، هم كؤتك يئدي كؤپك، هم كپك يـئدي كؤپك
- ساريمساقلاساق دا ساخلاساق ساماني، ساريمساقلاماساقدا گلير زاماني؟ ساريمساقلاساق دا گليرسه زاماني، نييه ساريمساق‌لاماياق ساماني
- سريه سورونو سورويه- سورويه سالدي سرين سردابييا
گؤنده ر
بؤلوم لر:
آذري