قايناق شخص:
رقيه طاهري، 63 ياشيندا، ساوادسيز، بوستان آوا (اوجان ماحالي) قئيده آلينان تاريخ: قيش 1387
ائل بيليمي: آذربايجان زنگين مطبخي‌نين بير چوخ يئمك چئشيتلري اونودولوب، سوفره‌لردن قيراغا قويولماقدادير. بونلارين قئيده آليب توپلاماقلارينين مطبخ كولتوروموزون زنگينليگي‌نين قورونماسيندا اولان رولو گون كيمي آيديندير. بورادا بوستان‌آوانين كوردكنديينده يايغين اولان بير نئچه شوربا ايله تانيش اولاجاقسينيز.
چالما شوربا
لازيمي ماترياللار:
سؤزو (كاوار)، سوغان، قووورما، يارما، لپه، ساري‌كوك، يومورتا
حاضيرلاما:
سوغاني اينجه-اينجه دوغراييب، دوغرانميش سؤزويلا بيرليكده كرهده قوووردوقدان سونرا ساري‌كؤك قاتيب، دوز ووروب، اؤنجه‌دن قوورولموش قووورمالاري بونلار ايله قاتارلار. ايسلانميش يارماني دا آرتيراندان سونرا ايچريسينه ايستي سو آرتيريب وام (لام) آياقدا پيشمگه قويارلار. لپهلري آيري قابدا پيشيريب، اونا آرتيرارلار. بونلار پيشديكدن سونرا ان نهايت بير-ايكي يومورتاني بير آيري قابدا ياخشيجا چاليب يئمگه آرتيريب، قابلاماني اوجاقدان گؤتورمه‌يينجه قاريشديرارلار.
گؤبلك شورباسي
لازيمي ماترياللار:
گؤبلك، مرزه، سؤزو (كاوار)، دوز
حاضيرلاما:
يازدا ياغيش ياغاندان سونرا دوغال گوبهلگي دريب، ياخشيجا يويوب دوزلاياندان سونرا قووورارلار. بو قوورولدوقدا سوزو ايله مرزه‌ني ده اينجه-اينجه دوغراييب گؤبلكلره آرتيريب
بيرليكده قووورارلار. ان سون شوربانين سويونو آرتيريب ، وام (لام) آياقدا پيشمهيه قويارلار. بو شورباني يئينده لاواشي اونون ايچريسينه دوغراييب يئيرلر.
چيديق شورباسي
لازيمي ماترياللار:
چيديق Çıdıq (يازدا سولو –ياغيشلي يئرده تاپيلان گؤيرنتي)، سوغان، سوزو (كاوار)، يومورتا، ساري‌كؤك، دوز
حاضيرلاما:
سوغاني اينجه-اينجه دوغراييب كرهده قوووردوقدا، سوزو ايله چيديغي دا تميزلهييب يويوب بونا آرتيريب، سونرا دوز ايله ساري‌كؤك ووروب يئنه بيرآز قووراندان سونرا اونا بير ليتر ايستي سو تؤكوب پيشمگه بوراخارلار. قابلاماني اوجاق اوستوندن گؤتورمه‌دن بير-ايكي يومورتاني آيري قابدا چاليب شوربايا آرتيرالار. شوربا قاينايانا كيمي اونو قاريشديرارلار. شوربا اؤزونو تاپديقدا اوجاق اوستوندن گؤتوروب ايچريسينه لاواش دوغراييب يئيرلر
قاتيق شورباسي
لازيمي ماترياللار:
سوغان، قاتيق، دوز، يومورتا، سوزو (كاوار) و آيري بير بيتگيلرده ايشلتمك اولار
حاضيرلاما:
سوغاني اينجه-اينجه دوغراييب كرهده دوز ايله بيرليكده قووورارلار. سونرا سوزو و اولورسا باشقا بيتگيلري ده اونا آرتيريب قوووروب، اوستونه بير ليوان سو تؤكرلر. سو قايناياندان سونرا بير كيلو يوغوردو (قاتيغي) چاليب، قابلامايا آرتيريب، قاينايانا كيمي قاريشديرارلار. بو قاريشديرما اولماسا يوغورت چوروير. بونلار قايناديقدا بير يومورتاني آيري بير قابدا چاليب آرتيرارلار. بو شورباني دا لاواشلا يئير
قايناق:
آذربايجان ائل بيليمي- سايي 2 - بهمن 1387
گؤنده ر
بؤلوم لر:
آذربايجان