قايناق شخص:

هجر پيران، 69 ياشيندا، اهرده دوغولموش. قئيد آلينان يئر و تاريخ: ورزقان، هييق كندي، فروردين 1387

(فارسجا آدي: فرفيون، علمي آدي: Erobia)

سوددوين چشمه‌لرين قيراغيندا بيتن بير بيتگيدير و بو بيتگي‌نين گؤزل بير خاصيتي وار. بو اوت اورتادان قيرلسا، قيريلان يئردن سوده اوخشار بير مادّه چيخار. بو سوده اوخشار مادّه‌ني سويون اؤزونه داميزاندا سويون اوزو پرچم كيمي آل-الوان اولار. سونرا هر نه توز-تورپاق سويون اؤزونده اولسا محو اولوب و سو گؤز ياشي كيمي دورولار.

قالقان سودو Qalqan Südü

(فارسجا آدي: كنگر، علمي آدي: Circium)

قالقان، قاميش كيمي سولو يئرده بيتن بير بيتگيدير. قالقانلارين ان بؤيوكلريني اورتادان سينديريب ايكي گون گؤزلرلر. قالقانين سينديغي يئردن سوده بنزر بير ماده چيخار. بو ماده‌ني ساققيز كيمي چئينرلر. بو ساققيز (شيره) ديشلرين هرنه ساريسي يا كئهره‌سي وارسا آرادان قالديريب، ديشلرين ديبيني ده بركيدر.

سؤيود يارپاغي Söyüd Yarpağı

(فارسجا آدي: بيد، علمي آدي: Salix)

سؤيود آغاجي‌نين تر-تازا چيخميش يارپاقلارين دريب بير اوووج اونلاردان بير چايدان سودا قايناديب، قيزديرماسي (تبي) اولان آدامي اونلا درمان ائدرلر؛ بئله كي او سويو سرينله‌ديب، تبي اولان آدامين ال- آياغين اونلا يويوب قارنيني و آلنيني همين سو ايله ياشادارلار. بئله‌ليكله آدامين قيزديرماسي كسيلر.

ايير (اگير) Əyir

ايير داغلاردا بيتن بير بيتگي‏دير كي يايين آخير آييندا (شهريورده) بيتر. بو بيتگينين باش طرفينده اولان توخوملاريندان نئچه ساياق فايدالانماق اولار.

كورپه اوشاق سانجيلانيرسا، اييرين توخومون بير تيكه پارچانين آرسينا بوكوب، بير قابدا اوشاغين آناسينين سودويله ايسلادارلار. ايير سودو جانينا چكندن سونرا، پارچاني سودون ايچيندن چيخارديب، قابداكي سودو ائشيگه آتيب، پارچاني سيخارلار. اوندان چيخان سودو اوشاغا ايچيرديب، اونون قارين آغريسيني درمان ائدرلر.

بويوك آداملار دا بو توخوملاري آغيزلاريندا چئينه‌ييب، قارين سانجيلاريني اونلا درمان ائدرلر. دئمه‌ليييك كي اييرين توخوملاري چوخ شيرين اولار.

چرتدن قوشو

چرتدن قوشو يايين اول آييندا گول وئرن بير بيتگيدير. بيرينين گوزونده آغريسي اولسا يادا گوزونه بير زاد دييب گوزو قيزارسا يا بوزگله چرتدن قوشونون گوللريندن بيرآز قابا توكوب سونرا اونلارين اوستونه بير قيز اوشاغينا سود وئرن خانيمين سودوندن ساغيب قويارلار ايسلانسين. سونرا اونو سالارلار گوزه گوزون بوزون آرادان آپارار بيرده كسيلن يارايا چوخ فايداليدي.

داغ مرزه‌سيDağ Mərzəsi

ايستيليكدير و باهار فصلينده بيتر. اونون دملنميشي معده سانجي‌سينا فايدادير. كوفته تره‌سينه‌ده قاتارلار.

شاه تره‌سيŞah tərəsi

اونو قاينا‌ديب سويو ايله حناني (خيناني) ايسلادارلار. بو حناني قول-قيچين سانجي‌ ائله‌ديگي يئرلره قويوب، سانجيني درمان ائدرلر. شاه تره‌سي ايستي‌ليكدير بونا گؤره ده سويوقلوق ائله‌ين آدامين سانجيسي اولسا، اونو دملرلر يا دا اونو قويماغا وورارلار، سانجيني آرادان آپارار.

تورپك

يارپاقلاريني آشا وورارلار. ساري گوللري اولار. بو گوللرين دملنميشي معده سانجيسينا ياخشيدير.

قوش اببگي:

بير آدامين سينه‌سي آغريسا، قوش اببگيني قايناديب و اونون پيچيلقانلي سويونو اونا ايچيرديب اونو درمان ائدرلر.

شووَرَن Şüvərən

شوورني سودا ناباتيله دمله‌ييب قيزديرماني يا خوشگيتي اولان آداما ايچيرديب، اونو درمان ائدرلر.

بيزوشاBizovşa

بيزوشانين نارين توخوملاريني قووورارلار، ناباتيله دمله‌ييب، ايسهالي اولان آداما وئريب اونو درمان ائدرلر.

اَوه‌ليكƏvəlik

بو اوتو زوغلو- زوغلو دملييب، معده، كبد و بدن آغيرسي اولان آداما وئررلر. بو اوتون توخومونو بير قابدا يانديريب، توستوسونو، جاني سپن آدامين سپگيللرينه توتارلار.

سپگيللرين باشلاري قاراليب، درمان اولار. هابئله بو اوتون توستوسو چوخ پيشابا گئدن آداما دا فايداسي وار.

جاجيخCacıq

بو اوتو سودا قايناديب، قايناياندان سونرا تيليفيني سودان آييريب، سويونو ايچيب يادا آشا وورارلار. تيليفيني‌ده بدنين سانجي ائله‌ين يئرلرينه دوشه‌رلر.

خوروز بودو Xoruz Budu

بو اوت باهار فصلينده بيتر و اونون قاينانميشي قارين و باغيرساقلاري يوموشادار.

بورمادَ‌رَ‌ن Burmadərən

بو اوتو كيچيك واقتي شوربايا وورارلار. بؤيويوب، يئتيشندن سونرا، دريب قورودارلار. اونون دملنميشي آجي اولار و زهرلنن (مسموم اولان) آداما فايدا‌دير

قايناق:

http://www.azelbilimi.com

آذربايجان ائل بيليمي- سايي 2- بهمن 1387

گؤنده ر     بؤلوم لر: آذربايجان