مرند
آذربايجان باخير گووهنير سنه
قيزيلدان اوستوندور توْرپاغين مرند
گولر اوزون واردي آچيقدير قاپين
سندن اينجيمهييب قوناغين مرند
گؤزلليك يوردوسان ائي گؤزل ديار
يازدا دوزنلرين آل الوان چالار
قيشدا آغ بولوتلار داغان قار قالار
يايدا بوز كيمي دير بولاغين مرند
باهار گلجك آچار كؤكسونده چيچك
ميشوْوان باخديقجا آچيلار اورك
ياشيل باغلاريندا ساز چالار كولك
پايلار اريك، آلما بوداغين مرند
ايكينجي موغاندير يئكنده ميلين
اوردا اكير، بيچير بوغداني ائلين
آراز كيمي آخسين سئويملي ديلين
گونو، گوندن آرتسين نوْوراغين مرند
شئه چؤلده يارپاغان ميرواري تاخار
قيزيل لالهلرين ياماجلار ياخار
ياز آيلاري دره لردن سو آخار
يارانار بير نئچه ايرماغين مرند
نوحدان قاباقكي سان بيلينمير ياشين
هله ده جاواندير تورپاغين داشين
اوجا اولسون گؤروم هر زامان باشين
توخونماسين داشا آياغين مرند
هم جومه مسجيدي هم ده كي بازار
بابالاردان قاليب هله ده دورار
آغ داغين اوزاقدان گوموشه اوخشار
آلما ياناقلي دير ياناغين مرند
كاروانساران باخير آغ پاپاق داغا
قالان باش اوجادير دوشمز آياغا
عشهودده شيرران، دويجاندا زاغا
كمچيده قرهچي يايلاغين مرند
مشروطه چاغيندا يئكنلي خانلار
نوراله، بخشعلي، زونوزلو قافار
مكافات، عيسي خان، فرج له ستار
اولدولار بيرليكده داياغين مرند
ياشاييشدا گونون اولماسين قارا
تورپاغين نور سپسين گونشه آيا
اوستون گلمك اوچون شاختالي پايا
كؤزدن بوش اولماسين اوجاغين مرند
گؤروم دونيا بويو آغ اولسون اوزون
سولماسين ياناغين، دولماسين گؤزون
گزسين اود يوردوندا هميشه، سؤزون
سنه فخر ائيله سين اوشاغين مرند
يئكنلي (سيّد)ي سالما نظردن
وورغونوندو، حالين گل سوروش هردن
بيليرسن يولوندا كئچندي سردن
يانار ساخلاياندي چيراغين مرند
رياحي فر(سيّد)
گؤنده ر
بؤلوم لر:
شعر آذري