قالماسين
قادر الله بودور سندن ديله ييم
بولبولون اينتيقامي خارا قالماسين
عومرون باهاري يامان قيش اولدو
يئني يار آچيلسين قارا قالماسين
درويش اولوب قورشانميشام پوستوما
غم اوردوسو هوجوم ائتدي اوستوما
سحر يئلي سلام آپار دوستوما
گولسون اوره ئينده يارا قالماسين
بير درديم بئش اولدو بيله نيم يوخدو
آغلارام گوز ياشيمي سيله نيم يوخدو
قارانليق گئجه ده گله نيم يوخدو
صوبح آچيلسين شب تارا قالماسين
منيم بو درديمي بير الله بيلر
دوستلاريم آه چكر دوشمانيم گولر
كاتيب ياراداندان بير ديلك ديلر
منيم آهيم سيتمكارا قالماسين
