عرفان عالمينده
عيرفان عالمينده اينسان ايچينده
هئچ زامان ياخشييا يامان دئمزلر
اخلاق دفترينده قرآن ايچينده
رياكارا اهل قرآن دئمزلر
انسان اودور بوش دورماسين چاليشسين
عاشيق گرك عشق اودونا آليشسين
بير انسان كي هر نه گلدي دانيشسين
حياسيزا اهل ايمان دئمزلر
انسانلارين وفاليسي ياخشي دير
آينالارين شفافليسي ياخشي دير
اوغرونوندا اينصافليسي ياخشي دير
اينصافسيزا صاحب وجدان دئمزلر
دده كاتيب بو جمله يه خوش اينان
ايمانين خرمنين يانديرار يالان
وارليا دوست اولان يوخسولا دوشمان
هئچ قانوندا اونا اينسان دئمزلر
