وبلاگ شخصي اكبر زواري رضائي
MUHASEBE - FİNANSMAN VE DÜŞÜNCELERİM
تاريخ : دوشنبه 23 آبان 1390 | یازار : اكبر زواري رضائي

خويون كندلرينده اوينانان اويونلار

علي ظفرخواه


قايناق: ائل بيليمي درگيسي 22-جو سايي  (خوي اؤزل سايي)

El Bilimi Dərgisi 22. Sayı  (Xoy özəl sayı) Qaynaq:


علي ظفرخواه آذربايجان فولكلورونون توپلانيب، نشر ائتمه‌سينده بؤيوك امگي كئچيميشدير، آشاغيدا اوخوياجاغينيز بو اويونلاردان ايلك اوچ اويونو "موسي وكيلي" و "محمدرضاعيوضي"دن ائشيديب يازييا آلميشدير، قالان اويونلاري جناب علي ظفرخواه بير باشا اؤزو يازميشدير.

" ائل بيليمي رئداكسيه هئيتي"

خويون كندلرينده اوينانان اويونلارين چوخو، شهرده‎كيلرين تايي ايدي. من بو اويونلاري " فولكلور خزانه‎سي" و " ائل بيليگي ثروتيميز" كيتابلاريمدا قاپساملي شكيلده قئيده آلميشام. بونلارين هاميسيني من اؤزوم ياشاميشام. آما كندلرين آز سايي دا بعضي اويونلارين يالنيز آدلاريندا فرقلري واريدي. مثلاً شهرده "پيشيبدي" دئييلن اويونا، كندده " تاپ يولداشين" دئيرديرلر.

اويونلاري گرك باشارديقجا تام اينجه‎ليكلريني و گؤزلليكلريني عكس ائتديرمكله اولدوقلاري كيمي كاميل شكيلده قئيده آلاق.

شفاهي ادبيّاتين دوغما ديلده اؤزل عطيري، دادي و روح لطيفليگي واردير. توركجه اويونلاري فارسجايا چئويرن يازار آرتيق ديقّتلي اولماليدير. گرك سهولره يول وئريلمه‎سين. قايناق يازي كاميل اولدوقدا، بعضي اويونلار چئويريلنده، چوخ خلاصه و ناقيص شكيله دوشمه‎سينلر.

آشاغيدا خوي كندلرينده اوينانان بير نئچه اويون وئريلميشدير.

چالاغان چايداغي

"شيرين كندي" كنديندن

سؤيله‌ين: موسي وكيلي‎

اويونچولار ايكي بؤلونرلر. مثلاً يئددي نفر اويان، يئدي نفر بويان. هر دسته‎نين بير موللاسي اولار. بير دسته‎نين آلتي اويونچوسو قوللاريني بير _ بيرلرينين چيينينه قويار، داييره شكيلده دايانارلار. بو دسته‎نين موللاسي بير الي اويونچولارين چيينينده اولماقلا، جلد ترپَنر آييق _ ساييق بونلارين چئوره‎سينده دولانار، چالاغان كيمي چالماقلا سانكي چايداغيني دوشمندن قورويار.

او بيريسي دسته‎نين يئددي اويونچوسو بو موللا ايله گؤز _ گؤز ائدر، آتيليب بونلارين دالينا مينمگه چاليشارلار. چايداق دسته‎نين موللاسي ياخين دوشن اويونچو آياغي ايله وورماغا چاليشار و قويماز يولداشلارينين دالينا مينسينلر. گؤررسن اويونچولارين بيري يا نئچه‎سي زيركليك ائدر و وورولمادان آتيليب هره‎سي بيريني مينرلر. مينن اويونچو يورولونجا اونون داليندا قالار. اگر آياغي يئره ديرسه، ماللا اونو قيچي ايله وورا بيلر. ائله كي يورولدو، مناسب فورصتده يئنر قاچار. ممكن‎دور موللا زيرنگ اولوب اونو آياغي ايله وورسون. چايداق دسته‎نين موللاسي، بير الي اويونچولارين چيينينده اولماق شرطي ايله هر حالدا مينن اويونچولارين بيريني آياغي ايله وورا بيلرسه، ايكي دسته يئرلريني دييشرلر. يعني او دسته گلر چايداق قورار، بو دسته مينمگه چاليشارلار. اگر موللانين الي اويونچولارين چيينينده اولمازسا، مينن اويونچولارين هانسيني وورارسا، كؤو دئييل. بعضاً بيري زيركليك ائدر و موللانين اؤزونو مينر. بو دورومدا موللا آغيرلانيب جلد ترپنمز. گؤررسن اويونچولارين آلتي‌سيني ‌دا مينديلر. بعضي يئرلرده بو اويونا "ماللا ميندي" دئيرلر. بو اويونو خويدا دا اوينايارديلار و منيم ياريمچيليق ياديمدا قالميشدير.

كل اوْيونو

"شيرين كندي" كنديندن

سؤيله‌ين: موسي وكيلي‎

بير اويونچو اوزون بير سئجيم (قَزيلدن توخونموش يوغون ايپ) ين بير باشيني حلقه ائدر يوينونا سالار، دؤشو و قارينيندان گتيرر، پاچاسيندان چيخارداردي. ايكينجي اويونچو دا سيجيمين او بيريسي باشيني ائلنچي بوينونا ساليب پاچاسيندان چيخارداردي. ايكيسي ده بير باسماليقدا اوزو قويلو دوشر، مخاليف جهتده دؤرد ال_ آياقلاري ايله سورونر و چاليشارديلار او بيريسيني چكيب، اؤزلري اير‎لي گئتسينلر. مثلاً بيري اوچ آدديمجا او بيريسيني سورويوب قاباغا گئده بيلسه‎ايدي، اوداجاق ايدي.

نئچه آغاج؟[1]

گؤهران كنديندن

سؤيله‎ين: محمدرضا عيوضي

اويونچولار ايكي دسته‌يه بؤلونرديلر. هر دسته تقريباً اوزاق فاصيله‌ده بيري مئيدانين او باشي و باشقا بيريسي بو باشيندا دايانارديلار. هر دسته‌نين موللا آديندا بللي _ باشلي بير اويونچوسو گلر فاصيله‎نين اورتاسيندا دايانار و قرارلاشارديلار. دئيرديلر مثلاً بورادان تبريزه اون بئش آغاج.

موللارين بيري اؤز دسته‌سينه اوزون توتار سسله‎نردي: بورادان تبريزه نئچه آغاج؟ او دسته‌دن بيري دئيردي: مثلاً اون آغاج. بونلار تاپانماديلار. او بيريسي دسته‎نين موللاسي اؤز دسته‎سينه اوزون توتار سوروشاردي: بورادان تبريزه نئچه آغاج؟ مثلاً دئسه‎يديلر: اون بئش آغاج. موللالارين قرارينا دوز گلديكده، موللا دئيردي: قاخ (قالخ) باشينا. بو دسته‎نين اويونچولاري قاچار گئدر او بيريسي دسته‎نين اويونچولاريني بيري بيريني توتار، مينر، اؤز دوردوقلاري يئره كيمي اونلارين داليندا گلرديلر.

اگر بو دسته موللالارين قويدوغو قراري تاپانمازسايديلار، موللالار يئنيدن سوروشاجاق و اويون دوام ائده جك ايدي. بو اويونو خوي  شهرينده ده اوينايارديلار منيم ياديمدان چيخميشدير.

 

(1)ـ بير آغاج يول، آلتي كيلومتردير

----------------

قديم خستهكين اويونو

علي ظفرخواه

قديم خسته‎كين اويونونون، آلتي خانه‎سي اولاردي. معمولاً ايكي يا اوچ اويونچو اولاردي.

اليف ـ بيرينجي اويونچو بيرلردن باشلايار، بير ساخسي تيكه‎سيني يا بير ياستي داشي بيرينجي خانه‌يه آتاردي. هاقيشقا گئدن كيمي، بير آياغيني گؤيده ساخلايار، تك قيچلي جيزيغين اوستوندن بيرينجي خانه‎يه آتلانار و آياغييلا ساخسيني ايته‎له‎ييب ايكينجي خانه‌يه كئچيردردي. يئنه جيزيغين اوستوندن ايكينجي خانه‌يه آتلانار، ساخسيني اوچونجو خانه‎يه ايته‎لَيردي. بئله‎ليكله اويونا دوام ائديب، ساخسيني آلتينجي خانه‎دن ائشيگه ايته‎ليندن سونرا، تك قيچلي آتلانيب، جوت قيچلي ائشيگه دوشوب دئيردي: خسته‎كين. هر حالتده، اويونچو جيزيغي آياقلايارسا، يانار؛ ساخسي جيزيغين اوستونه دوشرسه يانار؛ گؤيده‌كي آياغي يئره دَيرسه يانار. بوحالدا يولداشي دئير: سن دوشدون. ممكن‎دور اويونچو لاپ اوزو اوسته يئره گله؛ آما قوللارين يئره داياق وئريب قويمايا گؤيده‌كي آياغي يئره دَيه. بو، دوشمك حسابيندا دئييل، قالخيب اويونا دوام ائده بيلر. ائله كي بيرلري قورتاردي، ايكي‎لري باشلايار. ائشيكده دوروب ساخسيني ايكينجي خانه‌يه آتار. اويونچو، تك قيچلي اول بيرينجي خانه‎يه اورادان ايكينجي خانه‎يه آتلانار و آياغي‌يلا ساخسيني اوچونجو خانه‎يه ايته‎لَير. قاباقكي كيمي دوام ائديب، آلتينجي خانه‎دن ائشيگه آتلانيب دئير: خسته‎كين سونرا اوچلر، دؤردلر، بئشلر و آلتيلاري اوينايار.

اويونچو، اويونون هر مرحله‎سينده مثلاً اوچلرده دوشرسه، اويونو وئرجك يولداشينا. يولداشي دوشدوكده، اويونچو قاباقكي قالديغي يئردن يعني اوچلردن اويونا دوام ائده جك.

ب ـ ائله كي اويونچو آلتيلاري قورتاردي، يئني بير مرحله باشلاياجاق ساخسيني بير آياغي‎نين اوستونه قويار، بو آياغي‎نين دابانيني يئره قويماقلا، يول يئريين كيمي هر آياغيني بير خانه‎يه قويار، جيزيقلاري آياقلامادان گرك بيرينجي خانه‎دن گيريب، آلتينجي خانه‎دن ائشيگه چيخا. هاياندا ساخسي زويوب يئره دوشرسه، اويونچو دوشمك حسابيندادير.

ج ـ بو مرحله‎ده، ساخسيني باشي‎نين اوستونه قويار، قاباقكي كيمي بيرينجي خانه‎دن گيرر، هر خانه‎يه بير آياغين قويار، آلتينجي خانه‎دن ائشيگه چيخار.

دـ بورادا قاباق ائس مرحله‎سي گلر. اويونچو باشيني قووزاييب اوزونو گؤيه توتار، يئري گؤرمه‎دن، ائشيكدن بير آياغيني بيرينجي خانه‎يه قويوب دئير: ائس؟ اگر آياغي جيزيغين اوستونه دوشمزسه، يولداشي دئير: ائس. سونرا ايكينجي آياغيني ايكينجي خانه‎يه قويوب دئير: ائس؟ اگر آياغي جيزيغين اوستونه دوشمزسه يولداشي دئير: ائس. بئله‎ليكله خانه‎لري بير _ بير گليب آلتينجي خانه‎‎دن ائشيگه چيخار. هاواخت اويونچونون آياغي جيزيغين اوستونه دوشرسه يانار.

رـ ايندي دال ائس مرحله‎سي دير. بو سفر باشين قالديريب اوزو گؤيه دالي‌ _ ‌دالي گلر. بير آياغيني بيرينجي خانه يه قويوب دئير: دال ائس؟ يولداشي دئير: ائس.

بئله‎ليكله خانه‎لري بير _ بير گليب آلتينجي خانه‎دن ائشيگه چيخار.

س ـ ائله كي اويونچو بو مرحله‎لري باشارييلا سونا چاتديردي، حقّي وار اؤزونه بير ائو توتا. ائشيكده دوروب داليني جيزيغا دؤندرر، ساخسيني چيينيندن آتار. هانسي خانه‌يه دوشرسه، بونون ائويدير، گئديب علامت قويار. داها يولداشي‎نين حقّي يوخدور، اويوندا بو خانه‌يه آياغين قويا. بو خانه‎يه يئتيشنده گرك اوستوندن آتلانا.

اويونچو ائو توتاندان سونرا يئنه بيرلردن باشلايار، توتدوغو ائوه يئتيشنده، گؤيده كي آياغيني يئره قويوب ايستراحت ائده بيلر. ممكن‎دور، اويونو يئنه باشارييلا سونا چاتديريب باشقا بير ائو توتسون. البته يولداشي دا باشاري الده ائتديكده اؤزونه بير ائو توتار. آنجاق بونون توتدوغو ائوي توتا بيلمز. اينديكي اوشاقلارين اويناديغي خسته‎كين اويونو، تقريباً 1332 ش. ايلي دوورلريندن موْد اولدو. يئني خسته‎كين اويونو، قاباقكي نوعدوندان جاليب اولدوغونا گؤره، اوشاقلارين طرفيندن منيمسه‎نيب سورعتله يايغينلاشدي. يئني نوع باشقا كيتابلاردا يازيلديغينا گؤره، داها قئيده آلماغي لازيم گؤرمه‎ديم.

هاچا مينمك

ايكي اوزون آغاج، كي هره‌سي‎نين آشاغي هاچا اولار (هاچاسي تقريباً بير قاريش يئردن اوجا). هر آغاجي بير الده ساخلايار، هر قيچيني بير هاچايا قويار و آغاجين دابانلاري اوسته يئريير.

آتيمين باشي قيزيل

اويونچولارين سايي جوت اولماليدير. اگر ايكي نفر اولارسا، بيري داليني ديوارا داياييب اَييلر و ايكينجي‌سي اونون بئلينه مينيب (آت كيمي) و ديـيـر: آتيميــن باشي قيزيل گـ ... قيزيل، آلميـشام سكسان تومنه، وئرمرم دوخسان تومنه. اويونچولار چوخ اولارسا جوت _ جوت بيري بيريني مينيب ديوار ديبينه دوزولرلر.

ائششگي سوواردين؟

بيري يولداشي‎نين قولاغيندان ياپيشيب ديير: ائششگي سوواردين؟ جواب وئرر: سووارديم. سوروشار: نه سويونان؟ جواب وئررسه سويوق سويوننان، قولاغيني برك بوروب و دييه‌جك: آغيزي دوندو، آغيزي دوندو. جواب وئر‌رسه: ايسدي سويوننان، يئنه قولاغيني بوروب دييه‌جك: آغيزي ياندي، آغيزي ياندي. دييرسه: ايليق سويوننان، قولاغيني بوراخار. بعضي‎لري يئنه قولاغيني بورار و ديير: اورگي بولاندي، اورگي بولاندي.

سيليم سوپوروم؟

بير اوشاق خبرسيز دالدان گلر، اللريني يولداشي‌نين گؤزلرينه قويار و سوروشار: سيليم، سوپوروم؟ جواب وئر‌رسه: آللاها باغيشلا، اللريني چكه‌جك.

د‌ده‌م منه كور دئييب

بير اوشاق الينه بير آغاج آلار، گؤزلرين يومار، آغاجي هر طرفه توولايار و ديير: د‌ده‌م منه كور دئييب، هر گلنه وور دئييب. يولداشينا دييرسه، البته كي دؤنوب ساواشاجاق.

ال وئريب چكيشمك

مستقيم بير جيزيق چكرديلر و جيزيغين هر طرفينده بير نفر آياغين جيزيغا قويار، ساغ اللرين بير _ بيرينه وئريب، چكرديلر. هانسي‌نين گوجو چوخ اولارديسا مقابل طرفي چكيب اؤز طرفينه گتير‌ردي.

پيشيبدي

بو اويونو يئكه_ يئكه گنج‌لرده اوينايارلار. ايكي نفر ال _ ‌اله ياپيشار، قالان اويونچولار دييرلر: پيشيبدي! و چاليشارلار فرصت تاپيب اللرينين شاپباسيلا او ايكي نفري وورسونلار. او ايكي نفر ده قاوالايار تا اويونچولارين بيريني توتسونلار و سعي ائد‌رلركي بير _ بيرلريندن آيريلماسينلار. يوخسا اللري بير _ بيريندن اوزولرسه، تك‎ليكده هر كيمي توتارسالار كوْو دئييل و هره‎سين بير يئرده باسيب دؤيه‎جكلر تا گوج بيللاهلا گليب يئنيدن ال _ اله وئرسينلر. بو ايكي نفر هر كيمي توتارسالار او گرك اؤزونه بير يولداش تاپيب بو ايكي نفرين يئريني توتسونلار. بو اويون چوخ تحركلي و خشونتلي‌دير.

تؤپادان توپايا

موغانين گئرمي شهرينده بو اويونو اوينايارلار( خويدا دا اوينانيلير). اويونچولار بؤلونوب توپا _ توپا معين فاصله‎لرده دورارلار. هر توپادا اوچ يا دؤرد نفر ال_اله ياپيشيب داييره دورارلار و بير نفرده اونلارين اورتاسيندا دورار. ايكي نفر ائشيكده بيرينين الينده قاييش او بيريسيني قاوالاييب وورماق ايسته‌ير. اودا قاچار بير توپانين آراسينا تپيلر. اورتاداكي اويونچو گر‌ك توپادان چيخسين. ايندي قاليب زير‌كليگينه كي نئچه قاييش يئيينجه اؤزونو باشقا توپانين آراسينا سالسين. او توپانين دا آراسينداكي چيخيب باشقا توپادا اؤزونه يئر ائتمه‌‎ليدير. بئله‌ليكله اويون دوام ائدر.

قاريش آتماق

ايكي نفر پوللاريني يئره دؤشرلر. هر بيريسي اؤزونون يا طرفين مهارت و باشاريغي‌ني ذهنينده گؤتور _ قوي ائدر، فاصله‌ني نظرده آلاراق هره اؤز نوبه‎سينده پوللارينين يئريني‌ دييشرلر. ائله كي بيري فاصله‎ني مناسب گؤردو، پولونو گؤتورر و طرفين يئرده كي پولونو توشلاييب آتار. اگر بير قاريشدان يا تعيين اولونان اؤلچودن فاصله‎سي آز اولارسا، طرفين يئرده كي پولونو گؤتورر. يوخسا اؤز پولونو دا اودوزار.

پول چؤندرمه

اويونچولار هره‌سي مساوي مبلغ پول اوست_ اوسته قويارلار. نوبه ايله باشقا بير سيكّه‎ني پوللارا وورار، هر سيكه‌ني چؤندره بيلرسه اؤزونونكو ائدر.

قاچيشماق

نئچه نفر باشلاييب بيرگه قاچارلار. هر كيم آخيرا تئز يئتيشرسه، بيرينجي اولار

حامام‌پوش

اوشاقلار هره‎سي اؤز قاباغيندا يئره مخروط شكلينده قورو توپراق تؤكر، سو گتيرر و مخروطون محيطي ني ايسلادار. اونون اوستونه قورو توپراق سپر، بير الي‎نين كفه‎سيني بو بالا تپه‎نين اوستونده دولانديريب ديير: حامام پوش پول گتير، پول گتيرمه‎سن قيل گتير. ياواش _ ياواش حامام پوشون قابيغي بركيير و گونبز (گنبد) شكلينده بير شئي اولار، ال قالين‎ليغيندا پالچيقدان اؤرتويو و ايچي ايسه قورو تورپاق. بير چؤپ ايله گونبزين دؤوره‌سينده نئچه قاپي آچار و بو باجالاردان قورو توپراقلاري ائشييه چكرلر.

خان توپبي

قديــم زامانلار كي سو بوْروُسو ائولره چكيلمه‌ميش ايدي، ائولرده آرخ و حوْووض اولاردي و كوچـه‌لرين اورتاسينداكي آرخدان داييم سو آخاردي. اوشاقلار بو آرخين پالچيغيندان هره‎سي بير آز گؤتور‌ر و خان توپبي دوز‎لد‎رديلر. يعني هره‎سي پالچيقدان هو‌نگ (هاون) شكلينده بير شئي دوز‌لدر و آغيزينين توپورجه‌يي ايله ديبيني صافالداردي. اوشاق بو پالچيق قابي بير اوْووجونا گؤتورر و يولداشينا دييردي:

- خان توپبي!

يولداشي جواب وئر‌ردي:

- گول توپبي.

دييردي:

- هاني قندي؟

جواب وئرردي:

- بودور گلدي.

الينده‌كي پالچيق قابي آغيزي اوسته يئره ووراردي. خان توپبي سس ايله پارتلاييب و ديبي آچيلاردي. مقابل طرف گر‌ك اؤز پالچيغيندان بونون پارتلاييب آچيلان يئريني دولدوراردي. اگر خان توپبي پارتلاماسايدي، اونون هاميسيني مقابل طرف گؤتوره‎جك ايدي. سونرا نوبت بو بيريسي‎نينكي ايدي ‌كي اؤز خان توپبوسون چالسين.

كورد گلدي

خويون " كورتئي" كندي و او طرف كندلر بلكه ده اكثر كندلرده اوشاقلار ياي فصلي گئديب كندين يانينداكي آخار چايدا چيمن زامان، ايسدي قوملارين اوستونده اوتوروب قيچلارين آچار و قوملاري قيچلارينين آراسينا ييغارديلار. اللريني دال‌بادال قوملارين اوستونه تاپبا _ تاپ چالار ( چاپار آتين آياقلارينين سسيني تداعي ائدر ) و دييرديلر:

- كورد گلدي، كورد گلدي.

اوستا عابباس

اويونچولارين بيري اوستا، بيري كؤروكچو و نئچه‎سي شاگيرد اولارلار. شاگيردلر چكيش وورماغين سسيني يانسيلايارلار:

- دودوقه، دودوقه.

و دييرلر:

- اوستا عابباس كؤرويو باس.

اودا يالاندان كؤروك باسار.

اوستا (دميرچي) ديير:

-آخشامدي كؤرويون آغيزين پالچيقلايين گئدك ائويميزه، بير نفر كي اؤنجه‎دن الينده پالچيق حاضيرلاييب، كؤروك باسانين آغيزينا سورتر. اوشاقلارين هاميسي گولوشر و اويون بيتر.

بابا وئر قيلينجي

اويونچولار، خام و جرياندان خبرسيز بير نفرين گؤزون باغلاييب بير آيريسي‎نين دالينا مينديررلر. تاپشيرارلار دييرسن بابا وئر قيلينجي! آتي سوروب، وئره‎جگيميز قيلينجلا قوشونو قيراجاقسان. اوشاقلار بير تاختا يا بير آغاجين اوجونو پالچيغا باتيرار، گؤزو باغلي ديينده بابا وئر قيلينجي، تاختانين پالچيقلي طرفين الينه وئر‌رلر. هئچ زاددان خبري اولمايان و بئلنچي زادا انتظاري اولمايان اونون، مزه‎لي عكس‌العملينه اوشاقلار گولرلر.

تكر سورمك

تكر، داييره شكلينده دمير مفتول يا دا نفت بوشقالارينين قيراغيندان چيخاريلميش بارماق ائنينده دمير اولاردي. بير ده دميردن بير دسته اولاردي كي اوجونو اييب تكره كئچيرديب سوررديلر. هردن ياريم مئتير بير آغاجين بير باشيني " دوچرخه منتشي" نه سؤيكه‎ييب سوررديلر. يا دا بير تكري آغاجلا دؤيجله‎يه_ دؤيجله‎يه سور‌رديلر. ماراقلي بوراسيدير كي من اؤزوم شووه‌نه‌دن شهره يئرده گلرسه ايديم ممكن ايدي يورولام. آما يولداشيمدان تكر بورج آليب سوروب قاچا _ قاچا گلنده يورغونلوق حيسّ ائتمزايديم كي هئچ بير آز دا كؤنلوم آچيلاردي!

توپ گئتمك

رئزين توپلا هر اويونچو تك‎ليكلده يئرده توپ گئدردي. يعني توپو بير الي ايله يئره وورار، قالخديقدا يئنه وورار و دوام ائدردي. هر اويونچو چوخ گئدرديسه اوداردي.

آغاج مينيب آت گزديرمك

اوشاق بير قلمه آغاجي بوداغي‎نين ديبيندن ياپيشار، قيچين آشيرار و الينه بير شويكه آلار، سانكي آت مينيب آما اؤزو آتين قاچماسيني يانسيلايار، آت كيمي كيشنه‌ير و هردن ده شويكه‎ني قمچي كيمي دالدان آتا وورار.



گؤنده ر 100 درجه کلوب دات کام گؤنده ر     بؤلوم لر: آذربايجان
آرشیو
سون یازی لار
یولداش لار
سایغاج
ایندی بلاق دا : نفر
بوگونون گؤروشو : نفر
دونه نین گؤروشو : نفر
بوتون گؤروش لر : نفر
بو آیین گؤروشو : نفر
باخیش لار :
یازی لار :
یئنیله مه چاغی :